San Lorenzo College of Davao school fiesta

Gisugdan ang selebrasyon sa ika-kinse nga school fiesta sa San Lorenzo College of Davao, Inc. (SLCDI) niadtong Oktubre 5, 2016 sa Santos nga Misa nga gipangulohan ni Most Rev. Romulo G. Valles, D.D., presidente ug chairman sa Board of Trustees sa maong tulonghaan.

Bag-o nagsugod ang Santos nga Misa, nagpahigayon sila ug Procession pagpahinungod kay San Lorenzo Ruiz, ang patron sa maong tulunghaan, ug Recitation of the Holy Rosary, pagpasidungog kay Mahal nga Birheng Maria, tuyok sa may Talomo area. Ang tema karong tuiga: “San Lorenzo Ruiz, Pinoy sa Puso’t Diwa, Kristiyano sa Kaluluwa’t Gawa.”

Sa homiliya, aduna gayuy elemento sa pagpasalamat ang pagsaulog sa piyesta. Giawhag niya ang katilingban sa SLCDI nga magpasalamat sa gasa sa tulunghaan, sa mga nagdumala niini, mga magtutudlo, mga estudyante ug mga ginikanan ug guardians nga nagpadala kanila sa maong tulunghaan.

Gihagit niya ang tanan nga musunod sa kasing-kasing ni San Lorenzo Ruiz nga mapasalamaton sa Diyos ug andam mutagana sa iyang kinabuhi bisan libo pa kini, alang sa atong Diyos. Dugang pa ni Yanong Muloy nga kung kita halayo sa Ginoo, daw kulang ang apan kung kita uban Kaniya, makaangkon gayud kita sa malipayong kinabuhi.

Ikaduhang punto nga gisaysay niya mao nga “adunay kinabuhi latas pa niining atong kasinatian karon. Ang atong katapusan wala niining kalibutana, apan didto uban sa Ginoo sa kinabuhing dayon.” Dugang pa ni Arsobispo Valles nga ang atong panaw “muondang lamang kung kita makatagamtam na sa tiunay nga kalipay didto sa langit.”

Ikatulong punto mao ang kanindot sa kasinatian tungod sa mga higala nato sa kinabuhi. “Sama ni San Lorenzo Ruiz nga nahimong martir sa Simbahan uban ang iyang mga higala, nanghinaut si Arsobispo Valles nga kita mamahimong higala nga magdala ug kaayuhan sa uban, ug dili kadautan. Unta sa adlaw-adlaw nato nga kinabuhi, mahagit kita nga musunod sa panag-ingnan ni Hesukristo, ug ni San Lorenzo Ruiz, ang unang Pilipino nga Santo sa atong Simbahang Romano Katoliko.”

Pagkahuman sa Santos nga Misa, gipasundayag dayon ang Play on the Life of St. Lorenzo Ruiz, nga nakapatandog sa pagbati sa mga nanan-aw. Nakita nila ang lisod nga nahiaguman ni San Lorenzo didto sa Japan aron panalipdan ang iyang Katolikong Pagtoo.

Nisunod dayon ang opening ceremony sa Sports Festival nga gipangunahan nila Rev. Emmanuel G. Calumpong, ang School Director, ug Mr. Sean Anthony N. Yap, ang School Principal.

Ang maong school fiesta nilungtad hangtod Oktubre 7, 2016 diin gipahigayon ang Field Demonstration sa tanang mga estusyante gikan Kinder 1 hangtod Grade 11 ug presentations sa ilang mga ginikanan.

Aduna usab nagkadaiyang booths sa mga estudyante ug ilang mga ginikanan sulod sa school grounds nga nagdungag ug kabibo sa selebrasyon ug Intramurals. Panghinaut sa mga nagadumala ug mga magtutudlo sa SLCDI nga kining fiesta celebration activities maglig-on pa sa relasyon sa tanang miyembro sa ilang katilingban, ug nga pinaagi sa ilang mga mahinungdanong buhat, kini makapahimuot kay San Lorenzo Ruiz ug sa Diyos.

Ang SLCDI usa sa mga Catholic schools nga gipanag-iyahan sa Arkidayosis sa Dabaw. (By Jimmy T. Jesuro/SLCDI Guidance Counselor)