Protestante nagtukod ug St. Jude GKK

Dear KNOT,

Niay akong gustong i-share nga Kwento ni ate Maria Florence “Eng eng” Valera. Siya apo sa Philippine Army First Lieutenant Florencio V. Valera. Ika-upat sa lima ka mga anak ang iyang amahan.

Natandug ko sa iyang istorya ug haum kini sa muabutay nga pista ni St. Jude sa Oktobre 28.

Nadakpan si Lolo Florencio sa mga sundalong Hapon niadtong World War II, didto sa iyang balay sa Sitio Maslog, Island Garden City of Samal. Siya gidala sa Davao City ug nahimong “prisoner of war.”

Sulod sa selda, kauban sa iyang lolo ang lain pang duha ka piniriso. Pait ang kinabuhi. Ginaitsa ra sa salog ang ilang pagkaon. Hangtud sa duha na lang sila nga nabilin sa selda pagkamatay sa usa sa iyang kauban.

Ang protestante nga lolo gihatagan ug prayer guide aron iyang magamit sa pag-ampo. Gibalibaran niya kini tungod kay wala niya mailhi kun kinsa ang dagway sa iyang pangayuan ug tabang.

Apan iya gihapon gigamit aron mamahimong giya sa pag-ampo.

Sunod adlaw, sa wala mailhing rason, iya na lamang nakita nga naghikog na ang naghatag kaniya sa prayer guide. Naguol siya pag ayo kay siya na lamang ang nahibilin sa selda. Apan natingala siya kay, human sa duha ka adlaw nga inampo, gipagawas na siya aron makauli sa ilang panimalay.

Nalipay siya sa nahimong pagpagula kaniya sa kulongan. Maong iyang gidala pauli ang prayer guide, nga iyang gituohang rason sa iyang pag gawas.

Iya dayong gipangutana ang iyang asawang si Alfonsa kun nakaila ba siya sa larawan. Ug iyang nahibaw-an, mao kadto si St. Jude Thaddeus.

Sa iyang kalipay, iyang gipahimuan ug kapilya ang maong santo ug nipalit siya ug estatwa niini. Kini nahitabo dekada 1940’s diin nahitabo ang World War II.

Human ang 60 ka tuig, ang bag-ong kapilya ni St. Jude Thaddeus sa Sitio Maslog, Barangay Sto. Niño, Babak District, kabahin na nga usa sa mga GKKs sa Virgen Dolorosa Parish, Island Garden City of Samal. Sa ikatulong tuig sukad kini nagpahisakop sa Parokya, padayon ang mga miyembro sa pamilya, mga mag uuma nga ilang trabahante aron muapil sa kalihukan niini sama sa Kasaulogan sa Pulong ug Birhen sa Barangay. Saulogon sa GKK ang ilang kapistahan karong 28 sa Oktobre.

Usa lamang kini kapin 1,800 ka mga GKKs sa Arkidayosis sa Dabaw. Salamat kay Lolo Florencio ug sa katawhan sa Diyos sa walay hunong nga paghawid sa pag-ampo gikan pa kaniadto hangtod karon. Salamat KNOT! – Joseph Magdaherin