‘Peace Month’ gisaulog sa Davao Oriental

‘Peace Month’ gisaulog sa Davao Oriental

Gipangunahan sa probinsya sa Davao Oriental ang pagsaulog sa bulan sa kalinaw sa Setyembre, diin napili ang tema nga: ‘Month of Peace: tayo ang pagbabago, tayo ang kapayapaan.’

Sa usa ka dakong selebrasyon gitambongan sa mga representante sa managlahing mga organisasyon—sibiko, NGO’s ug relihiyoso, ug sa mga empleyado sa probinsya dili pa lamang madugay, gipasabot ni Provincial Director Yvette Tolentino-Sunga nga gimando sa usa ka presidential decree ang maong kasaulogan diin tumong ang pag-angkon sa matuod nga kahulogan sa kalinaw ug sa pagsumpo sa ginadiling droga.

Si Davao Oriental Provincial Director, Police Senior Supt. Harry Espela miingon nga handumon ang okasyon taliwala sa kagubot, partikular na ang pagpamomba sa dakbayan sa Davao, ug ang Twin Tower bombing sa New York, niadtong Setyembre 11(9/11).

Sa samang bahin, si 701st Infantry Brigade Deputy Commander Col. Rodolfo Labadia naglatid sa papel sa Philippine Army sa pag-angkon sa kalinaw sama sa pagpakusog sa ilang Peace and Development Outreach Program (PDOP).

Si Bise Gobernador Nino Uy naghatag ug ideya sa pakiag-alayon. Matud pa niya, “We are partners for peace in nation building.”

Human sa mga mensahe, misunod ang pinirmahay sa “peace covenant.”

Kasinatian sa kalooy sa 2 ka pari naghatud ug kaayohan

Dugang pagpa-ambit sa duha ka pari nga nahisakop sa kongregasyon sa Ministers of the Infirm (MI) sa St. Camillus Hospital.

Si Fr. Marven Ruyeras, MI, hospital director, misaysay sa iyang kasinatian sa dihang usa pa siya ka seminarista.

Matud niya, halos dili niya maaguanta ang baho sa pipila ka mga masakiton sa usa ka balay-tambalanan, apan tungod sa panultihon ni San Camilo, “Seeing Christ in the Sick and Being Christ for the Sick,” nagpaubos ug nagpailob siya hinungdan nga nasinati niya ang kalipay diha sa pag-alagad sa mga masakiton.

Si Fr. Roderick “Eric” Tampis, MI, bag-ong general services director, miingon usab nga dili limitado sa kapilya ang iyang paghalad sa iyang pagka-pari, kondili diha sa iyang pag-alagad sa ‘general services,’ mas nasulayan ang iyang pasensya.

Siya nagapaningkamot nga pugngan ang kaugalingon, ug magpakita ug maayong panig-ingnan nga maoy bunga usab sa iyang pag-ampo ug pagpamalandong.