Pagtabang sa Voluntary Service Reformation: Diyosesis sa Digos nakig-alayon sa panggamhanan

Nagtigum ang mga opisyales sa lokal nga panggamhanan kauban si Bp. Guillermo Afable sa Home of the Clergy Seminar House niadtong Oktobre 18, 2016.

Ang mga representante gikan sa mga ahensya sa gobyerno sama sa PNP, DILG, DOH, ug DSWD nga nagagikan sa mga probinsiya sa Davao del Sur ug Davao Occidental ingon man sa mga apostolado sa tibuok Diyosesis sa Digos nga girepresentar sa mga parokya, Diocesan Apostolates, ug schools milingkod aron masabtan ang padayon nga kampanya batok sa iligal nga droga kon “Oplan Tokhang.”

Gipatin-aw sa PNP sa maong tigum kung unsa ang proseso sa pagtabang sa mga drug dependents kon sila mosurender sa gobyerno isip kabahin sa “Project Double Barrel.”

Nakita usab sa maong panagtigum ang kadako sa problema nga angay’ng sulbaron dili lamang sa mga kapulisan kon dili sa tanang lumilihok sa komunidad lakip na ang simbahan aron matabangan gayud ang mga drug dependents sa pagbag-o sa ilang kinabuhi.

Ang DILG usab naglunsad ug Mamamayang Ayaw Sa Anomalya, Mamamayang Ayaw Sa Ilegal na Droga (MASA MASID) aron mamahimong kabahin ang komunidad sa pakigbisog batok sa mga ilegal nga binuhatan ilabi na sa droga.

Apan labaw pa sa pakigbisog aron maundang ang iligal nga droga, usa sa mga programa nga gihan-ay sa MASA MASID mao ang pagtabang sa mga surrenderees pinaagi sa mga organizational activities nga makatabang kanila ug sa komunidad sama na lamang sa tree planting activities, Zumba, sports, livelihood programs.

Lakip na usab niini ang pagsuporta kanila pinaagi sa paghatag ug mga job opportunities. Matud pa sa DILG, nahilakip sa pagtabang niining mga biktima sa droga ang mga LGUs, Liga ng Barangay, Barangay Anti-Drug Abuse Council (BADAC), ug ang mga faith-based organizations sama sa Simbahan. Andam usab ang DOH sa pagtabang sa kanila pinaagi sa Community-Based Rehabilitation Program (CBRP) nga giandam usab sa DILG.

Ang Simbahan usab sa Diyosesis sa Digos adunay giandam nga programa aron makatabang usab sa mga misurrender. Gitawag nga “Sagop Kinabuhi Program (SKP)” resulta sa hiniusang pagtinabangay sa upat ka Diyosesis sa DADITAMA suffragan.

Kini naghatag usab ug intervention programs nga makatabang sa mga drug dependents aron maka-“recover” sila ug mahibalik sa normal nga kinabuhi.

Labut pa niini, gipalawon usab ni Bp. Afable nga usa sa mga problema sa socio-cultural na konteksto nga nasinati sa kapanahunan karon mao ang “culture of indifference,” “culture of poverty,” ug “culture of fear” nga nakaapekto sa tagsa-tagsa ka mga tawo dili lamang sa atong nasud kondili lakip na usab sa tibuok kalibutan.

Sa katapusan, nagkahiusa ang mga ahensiya sa gobyerno ug ang Simbahan sa pagtabang sa mga nabiktima sa droga ug pinaagi sa pagtinabangay malaumon nga magmalampuson kini sa umaabot. (Billy Lee P. Ulan-ulan)