“Pag-ampo kanunay ug dili mawad-an sa paglaum.”

Ika-29 nga Domingo sa Ordinaryong Panahon
Ex. 17:8-13/ 2 Tim. 3:14-4:2/ Lukas 18:1-8

Unsay mahimo sa usa ka walay ulaw ug dili matarung nga maghuhukom batok sa usa ka sapoton ug kanunay nga nagayangongo nga babaye sa pagtudlo kanato mahitungod sa hustisya ug sa pagkamatarung diha sa gingharian sa Dios?

Si Hesus nagsaysay kanato sa Ebanghelyo karon ug usa ka istorya nga tinuod kaayo – usa ka walay ikasukol nga babayeng balo nga gipahimuslan sa iyang mga katungod. Nga pinaagi sa iyang pagkamalahutayon, nabantog niya ang usa ka walay puangod nga maghuhukom hangtud nga siya nahatagan sa iyang hustisya.

Ang Pagkamalahutayon gantihan gayud ilabi na sa tawo nga adunay dakong pagsalig sa Ginoo. Gipakita ni Hesus nga ang atong Ginoo isip usa ka maayong maghuhukum, andam gayud kanunay nga modepensa ug mohatag kanato sa hustisya, panalangin ug hinabang kung kita nagkinahanglan niini.

Apan dali ra usab kita mawad-an sa katakus sa atong kasingkasing ug makalimot na sa pagpangayo sa atong langitnong Amahan alang sa Iyang grasya ug panabang.

Sa kinabuhi nato karon, mamahimong makatagamtam kita ug mga pagsulay ug kalisdanan, apan kita dili angay mawad-an ug paglaum diha sa Dios. Ang adlaw sa katapusang paghukom mopadayag nga ang hustisya sa Ginoo magmadaugon gayud batok sa tanang mga inhustisya. Kadtong adunay dakong pagsalig ug pagtoo diha sa Dios, makalaum gayud sa Iyang bug-os nga pasalig. Sila makadawat sa ilang ganti, kon dili man niining kinabuhia, sigurado nga mahitabo kini sa panahon nga maghari na ang Ginoo uban sa katarong, kalinaw ug hingpit nga kalipay.

Gitapos ni Jesus ang iyang sambingay pinaagi sa usa ka pangutana alang kanato nga nag-ingon: “Ikaw ba ug ako adunay hugot nga pagtoo, ang matang sa pagtuo nga dili gayud mawad-an sa paglaum diha sa Dios ug magmalahutayon hangtud sa katapusan sa atong kinabuhi ug hangtud nga ang Ginoong Hesus mobalik diha sa himaya ingon nga Magmamando ug Maghuhukom sa Tanan?”

Ang hugot nga Pagtoo (faith) usa ka bug-os ug walay bayad nga gasa nga gihimo sa Dios nganhi kanato. Dili kita makatoo, makasalig ug molahutay nga malaumon kung wala Siya miuna ug pagpadayag sa Iyang kaugalingon nganhi kanato ug sa pagpadayag sa Iyag maloloy-ong gugma ug pag-amoma. Busa kon gusto kita nga motubo ug molahutay sa hugot nga pagtoo hangtud sa katapusan sa atong kinabuhi, nan kita kinahanglan gayud nga amomahon nato ang atong hugot nga pagtoo uban sa pulong sa Dios ug sa pagpangayo sa Ginoo nga kini molambo pa.

Busa ang hagit mao kini: Sa diha nga ang mga pagsulay ug mga kapakyasan nakapabugnaw sa atong pagtoo, asa man nato ibutang ang atong paglaum ug pagsalig? Nagaampo ba kita nga inubanan sa malaumong pagtoo ug pagasalig diha sa maloloy-ong gugma ug pag-amoma sa atong Ginoong Dios? (Reberendo Emmanuel G. Calumpong)