Misyonerong Simbahan, Nagasaksi sa Kalooy

Nia na usab ako. Mangahas na usab ako makigpanaw kaninyo nga mga suking magbabasa sa atong Davao Catholic Herald. AkoHerald!

Niining Dominggo sa Misyon tuguti ako nga ipaambit nako ang minubo nga sumada sa binisaya sa mensahe sa atong Papa Francisco alang niining adlawa. Hinimo kini sa Misyon Director sa Diyosesis sa Digos nga si Fr. Jupiter Canoy.

Ang atong Santo Papa sa iyang mensahe alang sa pagsaulog sa Adlaw sa Misyon sa Tibuok Kalibutan o “World Mission Day 2016” karong bulan sa Oktubre, nagpadayag nga ang Hubileyo sa kalooy nga atong gisaulog karong tuiga o “Extraordinary Jubilee Year of Mercy” nag-awhag kanato sa paghatag ug dakong importansya niining gitawag ug “mission ad gentes” o misyon ngadto sa tibuok kalibutan (the mission to the world) isip usa ka dakung gimbuhaton sa kalooy, nga nagalangkob sa espirituhanon ug material nga aspeto sa kinabuhi sa tawo.

Matud pa ni Santo Papa Francisco, ang “Word Mission Sunday” nagtawag kanato nga mamahimo kitang misyonerong disipolo o “missionary disciples of Christ” diin ang matag usa andam nga mopaambit sa iyang talento o abilidad, pagkamamugnaon, kaalam ug kasinatian aron sa pagsangyaw sa mensahe sa Dios mahitungod sa Iyang kalumo ug kalooy ngadto sa tanang katawhan sa tibuok kalibutan.

Iyang gipahinumdum nga pinaagi sa sugo sa misyon o “missionary mandate,” ang Simbahan nag-atiman niadtong wala pay kahibalo ug wala pa gayod makadungog sa Ebanghelyo ug wala pa makaila ni Kristo tungod kay buot sa Simbahan nga ang matag tawo, batan-on, hamtong ug tigulang makaangkon sa kaluwasan ug makasinati sa dakung gugma sa Dios.

Gihatagan usab ug pagtagad sa atong Santo Papa ang papel o luna sa mga kababaehan diha sa misyon sa Simbahan, diin Iyang nakita ang nagkataas nga ihap sa mga babaye nga nalambigit ug madasigon nga mihatag sa ilang kaugalingon ug mihimo niini. Iya kining gihulagway isip timailhan sa gugma sa Dios nga sama sa usa ka inahan o “God’s Maternal Love.”

Sa maong mensahe, iyang gihisgutan ang kabililhon sa edukasyon ug siya nanghinaut nga ang balaang katawhan sa Dios molahutay ug magapadayon diha sa iyang misyon sa pag-alagad sa kalooy diin kini makatabang gayod niadtong wala pa makaila sa Dios ug makasinati sa iyang sa iyang Diosnong gugma ug kalooy.

Ang atong Santo Papa nag-ingon usab nga ang tanang katawhan ug ang tanang kultura adunay katungod nga modawat sa mensahe sa kaluwasan nga mao ang gasa sa Dios ngadto sa matag-usa. Ug ang sugo ni Hesus sa pagsangyaw sa Ebanghelyo ngadto sa tanang mga nasud wala mausab ug wala natapos. Hinooa ang maong sugo nagapadayon sa paglanog hangtud karong panahuna ug naghagit kanatong tanan sa pagpamati sa maong tawag sa pagsangyaw, diha sa bag-ong kadasig taliwala sa mga hagit nga atong giatubang sa kasamtangang panahon.

Ug sa katapusan, siya nanghinaut nga ang atong Mahal nga Inahan, birhen Maria, ang modelo sa tanang mga misyonero sa Simbahan, magtudlo kanatong tanan sa pagpalambo ug panalipod sa buhi ug misteryosong presensya sa iyang anak nga si Hesus sa tanang dapit, diin iyang gibag-o ang relasyon sa mga tawo ug kultura ug nagpuno kanatong tanan sa iyang kalooy.