Ministriya sa repormasyon gilaraw

Ministriya sa repormasyon gilaraw
Ang “Ministry of Reformation” o kabag-ohan sa kaugalingon ang iorganisa sa diyosesis sa Mati agi’g tubag sa hagit sa wala damha nga halapad nga numero sa drug surrenderees sa tibuok nasud.

Kini usab ang gikasabutan sa nahitabong panagtigom sa Davao, Digos, Tagum Mati (DADITAMA) nga gi-host sa Mati diocese sa Isla San Victor sa Baganga, Davao Oriental sa pagdumala sa kura paroko sa Sto. Niño parish, Kinablangan, Davao Oriental nga si Fr. Roberto A. Ombon.

Matud pa ni Apostolic Administrator Fr. Edito S. Baño, kinahanglan gayud ang pagsalmot sa tanan sa mga paningkamot sa simbahan aron masulbad ang problema sa droga.

Nauna niini gisugyot ang pagporma og usa ka grupo o komitiba ubos sa ministriya o apostolado sa Social Action nga motutok sa maong butang, apan tungod sa hinanaling panginahanglan, gimugna ang usa ka bag-ong ministriya.

Usa ka module ang giandam nga maoy gamiton sa operasyon sa naasoy’ng ministriya, partikular sa pagkupot ug pag-amping sa mga surrenderees.

Gitun-an usab ang mga short-term plans samtang wala pa mahulma ang pinal nga plano. Una mao ang pagpalig-on sa information dissemination kabahin sa mga dautang epekto sa mga droga nga pagahimoon sa managlahing apostolado ug movements sa simbahan.

Ikaduha, mao ang pagsusi sa mga programa sa panggamhanan aron masayran kon unsa ang ginahimo nga mahimo usab sundon. Apan ang labing sayong aksyon, matud pa, mao ang pagpahigayon og mga sesyon sa pagpanambag kon “counseling” ug pagsaulog sa Santos nga Misa sa mga higayon nga ipa-report ang mga drug surrenderees sa nagkadaiyang mga barangay agi’g kabahin sa monitoring human ang boluntaryong pagsubmit sa kaugalingon. Giuyonan nga ang Diocesan Youth Apostolate (DYA) ang maoy moplastar sa pagahimoong mga kalihokan.

Mati may delegado sa 1st Nat’l Bible Congress
Gitambongan ni Sr. Belen Suemit, LGC, diocesan coordinator sa Bible Apostolate (BA) sa Mati ang labing unang National Bible Congress nga gipahigayon sa siyudad sa Laoag, Ilocos Norte niadtong Oktubre 5-7, 2016 sa usa ka hotel and convention center.

Usa siya sa mga delegado gikan sa Luzon, Visayas, ug Mindanao. Giulohan ang kongreso nga “First National Bible Congress in the Light of the New Evangelization” subay sa tema nga, “The Word of God is the Life and Mission of the Church.”

Sumala ni Sr. Belen, ang gigamit nga tema maoy resulta sa pinal nga pamahayag kon statement sa Nat’l Bible Workshop nga gipahigayon sa diyosesis sa Marbel, Koronadal City, sa miaging Pebrero 23-26, 2016.

Mahinangpon si Sr. Belen nga iyang mapaambit sa uban ang iyang nakat-onan sa Bible Congress, labi na sa misyon sa bag-ong ebanghelisasyon.