‘Liveloud’

Misa, kanta, sayaw, ampo ug testimonya.

Kini ang naglangkob sa kinaunhang “Liveloud” concert nga gipahigayon dinhi sa Davao sa Couples for Christ, duyog ang nagkadaiyang ministries niini sama sa Singles for Christ, Youth for Christ and Kids for Christ niadtong Septyembre 24, sa RSM event center sa PWC.

Gisugdan kini sa Santos nga Misa ni Abp. Romulo G. Valles, D.D. Matud pa niya, ang tanan nga pagahimuon sa pagdayeg ug pag-ampo alang sa katawhan kinahanglan gyud nga una ang pagsaulog sa Eyukaristiya “aron mabatunan ang grasya sa Diyos.”

Matud pa sa organizer nga si Joy Lestojas, “Daku ang akong kalipay sa pagtubag sa mga batan-on sa pagtambong ug pagpartisipar sa pagdayeg sa Dios sa kinasingkasing gayud.”

Aron mas daghan pa ang matagamtam nga grasya, upat ka miyembro ang naghatag sa ilang testimonya kabahin sa ilang kasinatian sa kaayo sa Ginoo. Ilang gipalawman kung giunsa sila pagtabang sa Diyos sa panahon sa pagsulay, problema, ug sakit. (Carmen Timario)