Laykong sama nako, gihagit sa pagka santo

Ang GKK sa san Lorenzo Ruiz nga sakop sa Assumption Parish, F. Torres St. nagsaulog sa ilang ika-20 nga kapistahan niadtong Setyembre 25 nga gipangulohan ni Fr. Hermie Garcia, SSS, ang kura paruko, diha sa El Rio Vista Phase 3, Barangay 19-B.

Matud pa ni Fr. Hermie, ang mga layko madasig unta sa panig-ingnan ni San Lorenzo sa pagpakita’g kaisog ug sakripisyo sa pagbarog sa pagtoo bisan sa mga pagsulay nga mohadla sa kinabuhi. “Ug dungog natong mga Pilipino kay siya mao ang pinaka-unang Santo sa Pilipinas nga gikan sa Luzon,” matod pa ni Fr. Hermie.

Kahinumduman nga si San Lorenzo nahiuban lamang sa mga misyonero nga miadto sa Japan aron sa pagsangyaw sa pagtulun-ang Katoliko, apan didto gilisod-lisod sila sa mga fanatics usab sa ilang namat-ang relihiyon. Gipugos sila pagsalikway sa ilang pagtoo aron maluwas sa silot nga kamatayon, apan bisan pa sa mga tortures nga nasinati, siya maisogong mibarog sa iyang pagtoo maong nahunos gayud ang iyang kinabuhi.

Siya nagkanayon, “Kon ako adunay usa ka libong kinabuhi, ihalad nako kining tanan sa akong Dios.” Ang Simbahang Katoliko human sa pagsubay sa kinabuhi ni San Lorenzo mideklara kaniyang Martir sa pagtoo ug Santo sa simbahan.

Sa Tuig sa Kalooy, kitang mga layko gihagit sa pagpakabana sa tawag sa panahon diha sa atong katilingban pinaagi sa “Corporal works.”

Busa atong tabangan ang atong mga igsoon nga nag-ilaid sa tumang kapit-os.

Bisitahan nato’g atimanon ang mga binilanggo, masakiton, ug ang anaa sa kadalanan nga walay pagkaon, pinuy-anan ug hinikawan sa mga kahamugaway sa pagpuyo.

Ipaambit nato ang atong panahon, abilidad ug bahandi bisan unsa kagamay og kadako, mas adunay kapuslanan o kahulugan kay gipaambit sa atong isigkatawo.

Si St. Mother Teresa of Calcutta nahimong santo usab sa maong birtud. Busa adunay inspirasyon ang atong pag-alagad. Ingon usab niini ang gipakitang pagtulun-an ni San Pedro Calungsod, ang Santo gikan sa Cebu nga usa ka Katekista.

Unta siya mahimong sumbanan sa mga batan-on.

Kon aduna sa kita’y unang presidente gikan sa Mindanao, unta musunod na aduna kitay mahimong Santo gikan sa Mindanao.

Apan mahimo man kitang popular sa kalibutan o dili ang mahinungdanon sa atong paglawig sa kinabuhi nakahatag kita’g tampo nga nakapahimuot sa atong Langitnong Amahan.

Nakaambit kita sa iyang pagka-maloloy-on, manggihatagon, matinabangon, mapasayloon ug mahigugmaon. Kining mga kinaiya nga apilan ug buhat sa akong kabahin, gisantos na nato ang atong kinabuhi alang sa kahimayaan sa atong Dios og Ginoo. Amen. (Carolina Carumba | Assumption Parish)