‘Kristo nga dili mamiya’: IEC Experience Sharing gipahigayon sa Immaculate Conception Vicariate

Isip kristiyanos, sumusunod ug anak sa Diyos, kita nagagahin gayod ug panahon matag Dominggo alang sa pagsalmot sa misa aron dawaton si Hesus pinaagi sa pagkalawat.

Ug aron mas mapalawman pa ang pagsabot sa Eyukaristiya, padayon ang pagpahigayon ug vicariate one-day International Eucharistic Congress (IEC) experience sharing. Niadtong Setyembre 24, ang Immaculate Conception Vicariate na usab ang nakasinati sa maong panagtapok.

Ang mga parokya sa Sto. Niño Kaputian, Immaculate Conception, ug Virgen Dolorosa, Sta. Cruz Talicud sa Island Garden City of Samal (IGaCoS) mao ang ikalima na nga gipahigayunan sa IEC experience sharing sa Arkidayosis sa Davao. Katuyuan niini nga madala sa tugkaran sa matag bikaryato ang nasinati sa mga partisipante sa IEC sa Cebu City niadtong Enero.

Lima ka gatos ug saysentay kwatro ka mga GKK Servant Leaders sama sa PSL, PSP, PSB, PSL, PSA, Caritas, CWL, Altar Boys, Legion of Mary ug uban pa ang misalmot niini.

Sama sa nauna nang IEC sharing, gisugdan kini sa eksposisyon sa Balaan nga Sakramento ni Fr. Rodrigo Salac, SVD, dayon nanguna as animation ang batan-on sa Virgen Dolorosa Parish.

Emosyonal ang kasagaran samtang nagpaambit ug kasinatian ang napiling parokyano kung unsa kamahinungdanon ang Eyukaristiya sa ilang kinabuhi ug giunsa sila pagluwas niini.

Aduna usab AVP nga gipakita bahin sa diskurso ni Most Rev. Robert Baron, D.D. diin gipalawman pa kini ni Fr. Ritsche Gamaya, DCD.

Matud pa niya, ang Eyukaristiya balaang pagpangaon, balaang sakripisyo ug balaang presensya. “Ang Eyukaristiya nahimong lawas ni Kristo nga atong pagadawaton aron kita mahiusa kaniya ug dili kita niya biyaan bisan paman kita mubiya kaniya.”

Ang partisipanteng si Guillermo Olden, usa ka Eucharistic Minister sa Peñaplata misaysay nga “usa sa akong nakutlo mao ang pagtugkad gayod sa kahulogan sa Eyukaristiya diin sa una ang akong pagsabot is just an ordinary celebration.” Tungod sa IEC experience sharing, karon iya nang napamatud-an nga ang Eyukaristiya usa diay ka pagkahiusa sa katawhan ug paghinumdum nga anaay Hesukristo nga dili mamiya.”

Dugang pa ni Juanita Enpancho, PSP sa Babak, “…kining panagtapok karon nakatabang sa pagpalawom sa akong pagtoo bahin sa Eyukaristiya. Alang kanako mao kini ang katagbawan sa akong kinabuhi, nakapalig-on sa akoa isip katekista kay kini mao ang pagkaon alang sa akong espirituhanong kinabuhi.”

Sumala pa ni Lorna Gonzales, formator coordinator sa Sta. Cruz Parish, “mura ko’g na-renew kay niabot sa point sa akong kinabuhi nga niundang ko ug serbisyo sa simbahan sulod sa dugay pud nga panahon, until such time nabati namo nga gusto ko mubalik sa pagserbisyo. So slowly nabalik nako ang value sa Eyukaristiya sa akong kinabuhi ug na-feel g’yud nako nga anaa gyud ang presensya nga buhi gyud si Kristo.”

Gitapos ang maong panagtapok sa usa ka Misa nga gipanguluhan ni Arsobispo Romulo G. Valles, D.D. Sa iyang homiliya, miingon si Abp. Valles, “ang pinakatumong sa IEC mao ang pagpaabot sa tanan nga ang pagkapundasyon sa Eyukaristiya, mao ang pagkatuburan sa kinabuhi sa simbahan.”

Dugang pa niya nga walay Simbahan kung walay Eyukaristiya. “Ang Eyukaristiya nagtawag kanato aron kita magkahiusa ug maporma nga simbahan.”

Gahapon gipahigayon ang IEC experience sharing sa bikaryato sa St. James didto sa Lasang, samtang ipahigayon ang kinaulahiang panagtapok sa bikaryato sa San Pedro karong Oktobre 8. (Merry Love Asoy | SNP Kaputian SoCCom)