“Gidawat ni Zaqueo si Hesus nga malipayon”

Ika-31 nga Dominggo sa Ordinaryong Panahon
Lukas 19:1-10

Unsay imong buhaton kon manuktok si Hesus sa imong pultahan ug moingon, “Ako kinahanglan gayud nga magpabilin sa imong balay karong adlawa?” Maghinam-hinam ka ba o maulaw? Si Jesus sagad nga moabot diha-diha dayon sa mga panahon nga wala damha ug nga sa kanunay Iyang ginabisita ang mga dili dinapit, sama sa mga kabus, mga bakol, ug bisan pa ang mga makasasala sa publiko sama kang Zaqueo, ang maniningil sa buhis! Ang mga maniningil ug buhis gitamay ug giisip nga mga sinalikway tungod kay sila nagapataw man ug sobra kaayo nga buhis sa mga tawo ug nakatigom ug dakong bahandi pinaagi sa pagpanghimulos sa uban.

Si Zaqueo usa ka pangulo sa mga maniningil sa buhis ug gidumtan sa tanan nga mga katawhan. Apan nganong gipili man siya ni Jesus ug gihatagan ug pasidungog pinaagi sa pagbisita Niya diha sa iyang panimalay?

Si Zaqueo nagkinahanglan sa kalooy, gugma ug kapasayloan sa Dios. Ug sa iyang panagtagbo kang Jesus iyang nakita ang labaw pa kay sa iyang gihunahuna nga posibleng mahitabo.

Sa diha nga si Jesus gihagit sa uban tungod kay Siya moadto sa balay sa usa ka makasasala, si Zaqueo naaghat sa pagbuhat ug butang nga makahulip sa iyang mga kasal-anan. Ug kining takos nga paghinulsol iyang gipakita pinaagi sa pagdesisyon sa paghatag sa katunga sa iyang mga kabtangan ngadto sa mga kabus ug sa paggamit sa laing katunga sa paghimo ug mga butang nga makahulip (restitution) sa iyang pagpanglimbong sa uban.

Ang pagpamatuod ni Zaqueo labaw pa kay sa mga pulong. Ang kausaban sa iyang kasingkasing miresulta usab sa pagbag-o sa iyang kinabuhi, usa ka tinood nga kausaban nga nasinati usab sa tibuok komunidad.

Ug kining gipakita ni Zaqueo, gitagaan ni Hesus ug dakong bili, pinaagi sa Iyang pulong nga nag-ingon: “Karon, ang kaluwasan nahiabut niining balaya.” Si Hesus, mianhi aron sa pagpangita ug pagluwas sa mga nawala.

Si Zaqueo wala nagpadala sa mga opinyon sa mga katawhan o ang pisikal nga limitasyon sa iyang pagkatao aron iyang makita si Hesus. Inay iyang gihimo ang kinanghanglan aron lamang makita niya kini. Sa diha nga gitawag siya pinaagi sa iyang ngalan, siya mitubag sa pagdapit ni Jesus ug nasinati niya ang dakung kalooy niini.

Ang Ginoo nagmando sa tanan nga mga butang alang kanato sumala sa Iyang tinguha alang sa kinatibuk-ang pagpasig-uli (total restoration). Gihatagan pa gani kita Niya sa Iyang mahigugmaong kalooy aron kita makaambit usab sa Iyang mga plano. Sama kang Zaqueo, kitang tanan usab kinahanglang magkinabuhi nga adunay kahusay diha kang Jesus.

Ug aron mabag-o ang atong kinabuhi, kinahanglan gayud nga buhaton nato ang tanan aron sa “sa pagsugat” kang Hesus. Adunay daghang mga paagi aron sa pagsugat Kaniya: diha sa pag-ampo, diha sa mga sakramento, sa pag-alagad sa atong isigkatawo, ug uban pa. Apan kinahanglan gayud nga maninunguha kita sa paghatag ug panahon ug sa pag-abli sa atong mga kasingkasing aron sa pagdawat Kaniya sa Iyang pag-abot.

Ang Ginoong Hesus andam kanunay nga magpuyo uban sa matag usa kanato. Nagahimo ba kamo ug lawak alang kaniya diha sa inyong mga kasingkasing ug diha sa inyong kinabuhi? (Reberendo Emmanuel G. Calumpong)