Dakong kahigayunan sa pagsaksi sa pagtoo

Karong semanaha, sa Nobiyembre 1 ug 2, magsaulog kita sa Piyesta sa tanang mga Santos ug ang Piyesta sa mga kalag sa purgatory (kalagkalag).

Sama sa “Pasko sa Pagkatawo” ug sa “Pasko sa Pagkabanhaw,” gihimo kini diri sa ato nga mga adlaw sa nasudnong paghunong sa trabaho aron ang katawhan mahimo nila ang mga sulondong balansayon niining mga adlaw.

Ang Estado, ang Simbahan, ug pribadong sektor nagkahiusa sa pagpahigayon niining mga kapistahan. Bisan og lain og tinuohan o walay pagtuo apil niining mga adlaw igpapahulay sa
trabaho.

Alang kanatong mga Katoliko, kining duha ka piyesta gipaluyuhan sa batakang gituohan nga gipadayag nato pinaagi sa Kredo – “Nagatuo ako sa panag-ambit sa mga santos, sa kapasayloan sa mga sala, ug sa pagkabanhaw sa lawas.” Mahinumduman nato nga kini ang mga ulahing artikolo sa atong Kredo.

Sa Nobiyembre 1 hiniusa natong saksihan ang usa ka dakong bahin sa atong kinaiya isip mga matoohon sa Dios – nga masantos kita sama nga ang Dios, Santos.

Ang panaw sa pagtoo mao ang pagkinabuhi nga balaan dinhi sa yuta maingon man sa langit.

Busa, niining maong adlaw matag tuig maghiusa kita nga magpadayag, “mahiusa unta kami uban kang Maria ang Inahan sa Dios, uban ni San Jose iyang bana ug sa tanang mga Apostoles ug sa tanang mga santos nga nagtuman kanunay sa imong kabubut-on latas sa katuigan.” “Ginoo, himoa kaming mga santos.”

Sa Nobiyembre 2 gipadayag nato ang kamatuoran nga atong gituohan ug gihuptan, “kapasayloan sa mga sala, sa pagkabanhaw sa lawas ug sa kinabuhing dayon” ( Kredo) Ang kamatayon dili mao ang katapusan sa kinabuhi. Mausab lamang ang kinabuhi.

Sa Purgatoryo, ang mga nangamatay, nga nagkulang pa sa kasantos tungod sa mga sala kansang epekto wala pa mabayri tanan, moagi pa og dugang paghinulsol ug pagbayad.

Ug ngadto-ngadto, sa tumang panahon mahiuban na gayud sila sa kahingpitan sa kinabuhing dayon tungod sa Diosnong kalooy.

Sila nga atong gipahanungdanan og mga pagampo, sakripisyo ug pagpenitensya natabangan pinaagi niini.

Nagpahinumdum usab kini kanato nga samtang buhi pa kita mapaubsanong makig uli na kita sa grasya sa Dios kansang kalooy walay kinutuban. Kay sa katapusan, ang Gingharian sa Dios lamang ang molungtad hangtud sa kahangturan.

“Pangitaa ang gingharian sa Dios ug ang katarong sa Dios, ug ning tanan ikadugang kaninyo, allelu alleluya.”

Busa mga kaigsoonan, magsadya kita ug salulogon nato kining maayong balita sa kaluwasan. Likayan unta ang mga pulong ug buhat, bisan maayo ug makalingaw, apan nagpahimakak sa kabalaanon niiining mga adlaw.

Likayan nato ang pagdugang sa kasamok ug kasaba sa palibot diin malinawong nahimutang ang mga labi sa atong mga kapamilya ug kapuso sa pagtoo.

Magmabungahon unta kining atong pagsaulog ug magsaksi sa kalibutan sa kamatuoran niining mga adlaw. (jimmg48@gmail.com)