Consultative, inclusive governance tumong sa Davao Oriental

Consultative, inclusive governance tumong sa Davao Oriental

Sulod sa tulo ka tuig, “consultative governance and inclusive development” ang gilayong matagamtam sa Davao Oriental.

Kini ang paghulagway nila Gov. Nelson Dayanghirang ug Vice Gov. Nino Uy sa ilang pagpadagan sa probinsya sukad sa ilang paglingkod, pinasikad usab sa suporta sa katawhan nga mibutang kanila sa pwesto.

Matud pa ni Dayanghirang sa interview sa Katolikong sibyahanang DXHM ug Trinity Cable TV, “dako kaayo ang akong responsibilidad nga matuman lamang pinaagi sa pagtinabangay ug partisipasyon sa tanan; importante nga makonsulta ang katawhan ug makuha ang ilang tingog.”

Ipadayon usab sa gobernador ang mga lakang sa kanhi administrasyon—“the exemplary performance of my predecessor now Congresswoman Corazon Malanyaon, whose vision and energy are very motivating in making Davao Oriental a champion province.”

Sa laing bahin, padayunon ni Uy ang pag-atubang sa isyu sa probinsya pinaagi sa panabang sa katawhan. Matud pa niya, (there would be) “more visible presence to get the pulse of the grassroots on issues and concerns embracing the province…so inclusive growth is our standing principle.”

Dugang pa niya nga adlaw-adlaw ang katawhan nagapanon sa ilang buhatan aron mangayo’g hinabang, ug kasagaran gina-refer sila sa DSWD, busa gihunahuna niya ang pagtukod og usa ka liaison agency sa ilang buhatan, aron dili malangan ang pagtubag sa mga problema.

Ang duha ka lider nagtinguha usab sa pagpapha sa “political division” nga nagakahitabo aron mapakita nila nga takus gayud sila sa dakong boto sa pagsalig kanila sa katawhan.

Segun pa sa bise gobernador, “It’s time to move on.  Let the division caused by election be healed with what we all long for Davao Oriental.”

St. Scholastica’s Enfide sa Mati, host sa SAMIN Daditama Assembly

Ang ‘St. Scholastica’s Enfide’ ang nahimong host sa panagtapok sa mga madre nga nagrepresentar sa Sisters Association in Mindanao (SAMIN) di palang dugay gikan Davao, Digos, Tagum ug Mati (DaDiTaMa). Kini aron hisgutan ang mga butang nga gituki sa SAMIN Assembly niadtong Agosto sa General Santos City.

Sa ilang panagtigom, gipakita usab sa kamadrehan ang ilahang pagsuporta sa mga OSB ug sa Macambol Community sa ilang pakigbatok sa gihimong pagmina sa lugar.

Giabiabi ang mga bisita sa usa ka fellowship lunch nga gipaambit sa mga Philberth Scholars ug ilang ginikanan.  Human niini, gidala sa Benedictine host community ang mga bisita sa Subangan, ang bantog nga Davao Oriental Provincial Museum, diin giingon nga gipadayag sa mga partisipante ang ilang pagkagusto sa kaanindot sa mga dagat ug waterfall sa Davao Oriental hilabi na ang Mt. Hamiguitan, UNESCO World Heritage Park, ug mga produkto sa managlahing munisipalidad.

Giprisinta usab ni S.M. Aurora A. Bravo, OSB ang mga pagtulun-an sa Sto. Papa sa encyclical, ‘Laudato Si’  nga gisundan sa pag-adto sa Brgy. Macambol aron makig-kolokabildo usab sa katawhan kabahin sa ilang anti-mining campaign, ug pagpakita sa suporta sa SAMIN sunod adlaw.

Sumala ni Sr. Evangeline Madayag, OSB, superiora sa komunidad sa mga madreng Benedictina sa Brgy. Dawan, Mati City, gipasibaw sa kamadrehan ang ilahang pagpasalamat sa katawhan tungod sa pagpakabana aron hunongon ang mga pagmina.

Giila usab sa SAMIN representatives ang abilidad sa mga lider sa tribo sa pagpadayag sa ilang mga ideya ug sa hiniusang paglihok.

Sa katapusang adlaw, gihalad ang Santos nga Misa sa simbahan sa Birhen de Guia, ug nagpadayon ang mga panaghisgot kabahin sa Macambol.

Gipasabot usab ni Sr. Evangeline nga wala madayon ang aktwal nga pag-adto sa mining site tungod kay “restricted” kini, ug nga kinahanglan nga anaa ang usa ka personahe gikan sa Mines and Geo Sciences Bureau (MGB) nga mouban sa mga bisita.

Sa wala pa manglakaw ang mga partisipante, subli silang nagpasalamat sa Benedictine community ug gidasig kini sa pagpadayon sa pagpanaw uban sa katawhan.

Gisaad ni Sr. Nancy Lao, RVM ang dugang suporta pinaagi sa mga “goods nga ipadala gikan sa Tagum.”

Samtang mapasalamaton usab si Sr. Evangeline sa ngalan sa OSB ug Macambol community sa partisipasyon sa SAMIN representatives, sa ilang suporta ug pagdasig sa ilang adbokasiya sa proteksyon sa kinaiyahan ug sa pag-amping sa yutang  kabilin sa mga tribo.