REMASE homecoming gipahigayon

Mipahigayon sa ilang ika -14 nga Alumni Homecoming ang mga kaparian ug mga dayakono nga migradwar sa Regional Major Seminary (REMASE) niadtong Agosto 22- 24. Ang maong panagtapok gitambongan sa kapin dosyentos ka mga kaparian nga naggikan sa lain laing parte sa Mindanao. Subay sa temang “The Joy of Loving the Eucharist Brings Us Together,” ang kaugdahan gipangunahan nila Fr. Rolando Mandreza sa Batch 2000 ug Fr. Orly Angelia sa Batch 2001.

Tumong sa maong panagtapok nga magkahimamat ug magkahiusa ang mga kaparian, tungod kay human sa ilang pag gradwar namalik na sila sa ilahang nagkadaiyang mga dayosesis. Ang maong panagtapok gilangkuban sa pipila ka mga aktibidades sama sa Misa, mga dula, panag-inambitay sa mga kasinatian, ug fellowship night diin gipasidunggan ang 2 ka mga jubilarians nga sila Fr. Pedro Sombilon sa Dayosis sa Cagayan ug Msgr. Ed Rodriguez sa Arkidayosis sa Dabaw. Matud pa ni Fr. Angelia, dako ang tabang sa mga seminarista tungod kay sila ang nangunay sa pagpangandam ug pagpadagan sa maong kalihukan.

Si Fr. Sombilon miingon nga “ Ang pagka-pari equal service kay mao man ang tawag ni Kristo. Ang 3 ka buluhaton ni Kristo nga Pagka Pari, Hari ug Pagka Propeta. Kon ang batan-on musulod sa Pagka Pari dili niya wad-on ang pagserbisyo sa katawhan sa Dios. Kon ang iyang pagka Pari alang lamang sa iyang kaugalingon, dili kini siya mulahutay sa iyang bokasyon sa pagka pari.”

Ang Rector nga si Msgr. Abel Apigo midugang nga dako kaayo ang iyang kalipay nga nagmalampuson ang gipahigayong Homecoming. “Ang tema gipalawman ni Abp. Valles mahitungod sa “Amores Laetitia” nga naghatag ug nindot nga kasinatian sa atong mga kaparian. Dugang pa ni Msgr. Apigo nga dako ang iyang pasalamat sa Dios tungod sa gasa sa bokasyon sa pagka-pari.

Si Abp. Valles mipahayag nga ang “komon nga realidad nga nabati diri mao ang kalipay sa mga pari mao ang gasa sa pagka-pari nga anaa sa ilang kinabuhi ang kalipay bisan pa taliwala sa sakripisyo ug daghang trabaho, apan ang kalipay nga makaalagad sa katawhan sa Dios.”

“Ako pod nga Arsobispo uban kanila natakdan pod sa kalipay, kay kalipay pod sa usa ka Obispo nga makita ang iyang mga Pari nga magkapundok.” Dako ang dungog sa Arkidayosis sa Dabaw nga ang unang seminary sa Mindanao, nia sa Dabaw ug dakong grasya nga ang Dabaw nahimong luna diin naporma ang mga pari ug karun nanguli sa ilang inahan nga seminaryo.” (Jane Imas | Training Asst.)