Pista sa Virgen Dolorosa gisaulog

Malipayong gisaulog sa parokya sa Virgen Dolorosa ang ika-55 nga kapistahan niadtong Septembre 15, 2016 subay sa tem, “Birhen Maria, Inahan sa Kalooy, Sumbanan sa Kristohanong Pamilya.”

Si Arsobispo Romulo G. Valles, D.D. ang nagmisa atol sa buntag nga naka-live hook up sa DXGN 89.9 Spirit FM, inubanan sa kura paroko sa Samal ug Kaputian nga sila Fr. Danny Dotollo ug Fr. Pepe Retorca, ug mga bisitang pari.

Gipahayag ni Arsobispo Valles sa iyang homiliya ang papel sa mga santo nga gideklara sa simbahan. Matod pa niya kini nagpamatuod lamang nga ang gisangyaw sa simbahan kaya kaayong buhaton sa matag usa. Ang listahan sa mga balaan gipangunahan mismo ni Birhen Maria nga puno sa pagpangga ug grasya sa Diyos.

Dugang ni Valles, nindot kaayo ang larawan ni Maria nga nagtindog sa tiilan sa krus. Kini naghatag kanato ug makabuluhan nga mga leksyon.

Una, tungod sa maong kasakit andam kanunay si Maria motindog alang sa atoa sa panahon sa atong kasakit kay siya mismo nakaagi niini.

Ikaduha, kun kita kanunay moduol kaniya ug ato siya pasudlon sa atong mga kasingkasing ug panimalay, kita motubo ug molambo sama sa iyang anak nga si Kristo.

Ikatulo, dapat dili nato kalimtan ang mga buhat ni Kristo. Angay sab kining buhaton sa kanunay. Si Maria ang atong inahan nga kanunay magdala kanato sa dalan sa kaluwasan.

Mapasalamaton si Rev. Fr. Mervin George Maglana, ang kura paroko a Virgen Dolorosa Parish uban sa iyang parochial vicar nga si Rev. Fr. Rodrigo Salac, SDV, sa tanang parokyano ug mga tao nga mitabang aron mamahimong malampuson ug malinawon ang maong selebrasyon. (Rommel R. Jandayan | VDP SoCCom)