Pagbaton ug Higala Gamit ang Bahandi ning Kalibutana

Sept. 18, 2016
25th Sunday in Ordinary Time
Am 8:4-7/ 1 Tim 2:1-8/ Lk 16:1-13

Ang tanan nga ania ning kalibutan binuhat sa Diyos alang sa kaayohan sa tawo. Sa ato pa, ang kapuno sa kinaiyahan sa kalibutan adunay usa lamang ka tumong ug tuyo, ug kini mao ang katagbawan ug kalipay sa tawo kang kinsa kining tanan gipiyal. Apan sumala sa atong mamatikdan, adunay mga tawo nga gi-abuso ang ilang pagkapiniyalan.

Anaa ang pagpanglimbong o pagpanlupig ilabina sa mga kabus ug walay nahot sa katilingban. Mao kini nakita ni propeta Amos nga maoy iyang gipadayag diha sa atong unang pagbasa karon. Nakita niya ang tinuod nga kahimtang sa Israel diin ang mga kabus giabusar ug gipahimuslan sa mga adunahan. Sa laktud nga pagkaistorya, nakita ni propeta Amos ang dili manggiangayon nga pagtratar sa katawhan, ug busa iyang gipasidan-an ang tanan ug giingnan nga isalikway gayud sila sa Diyos kun hilabihan ang ilang pagpakadatu sa ilang kaugalingon pinaagi sa pagpahimulos sa mga kabus.

Diha usab sa atong Ebanghelyo, atong madungog ang sugilanon sa usa ka limbungan nga piniyalan kinsa gipangayuan ug husay sa iyang agalon. Aron aduna siyay higala panahon nga papahawaon na siya sa iyang agalon, iyang gipatawag ang mga tawong adunay utang sa iyang agalon ug inay paninglan sila sa saktong kantidad sa utang, katunga o diyutay lamang ang iyang gipaningil. Sa iyang huna-huna nga kining mga tawhana magbaton ugma dawlag ug utang kabubut-on kaniya. Tataw kaayo nga sayup ang gihimo sa maong piniyalan tungod kay usa kadto ka lain na usab nga pagpanlimbong. Apan gidayeg siya sa agalon tungod sa iyang pagkamaalamon. Apan dili nato sabton nga gidayeg siya sa agalon tungod sa iyang pagpanlimbong. Gidayeg siya tungod kay iyang gigamit ang bahandi sa kalibutan aron maka-angkon siya’g mga higala.

Mao kini giingun ni Hesus diha sa atong Ebanghelyo: “Pagbaton kamo’g higala pinaagi sa mga bahandi niining kalibutana, aron inig kahurot na niini, dawaton kamo didto sa walay katapusang puloy-anan.”

Sa ato pa, ang tinuod nga maalamon nga piniyalan dili kadtong mga tawong limbungan, kun dili kadtong mga tawo nga minggamit sa ilang mga nadawat nga bahandi sa pagtabang sa uban, ilabina sa mga kabus ug nanginahanglan. Karon mangutana kita: giunsa man nato paggamit ang mga gasa, talento, ug bahandi nga atong nadawat gikan sa Diyos? Pananglitan, isip usa ka Kristiyano nga doctor, nurse, engineer, politician, o magtutudlo… giunsa nato paggamit ang atong mga kahibalo ug posisyon? Aron ba mas modaghan pa ang atong tinigum nga bahandi o kwarta? O aron makahimo kita ug mga higala sa mga kabus nga hilabihan gayud intawun ang panginahanglan?

Si St. Ambrose, usa sa mga inila nga Amahan sa Simbahan miingun nga: “ayaw isipa nga bahandi ang mga butang nga dili madala sa langit. Ang tanang mabilin niining kalibutan dili ato, ihatag kana sa uban.”