IEC Experience Sharing sa Bikaryato sa Sacred Heart of Jesus Malampuson

Nagmalampuson ang International Eucharistic Congress experience sharing sa bikaryato sa Sacred Heart of Jesus niadtong Setyembre 10, nga gipahigayon sa Mary Help Of Christians Parish.

Ang maong panagtapok giapilan sa mga pangulo gikan sa mga GKKs sa San Isidro Labrador Parish, San Francisco de Asis Parish, Mary Help of Christians Parish, Sacred Heart of Jesus Parish, St. John Paul II Parish, San Miguel Parish, ug San Pedro Calungsod Quasi-Parish.

Nagsugod ang programa nga gipanguluhan sa pastoral team gikan alas 8:00 sa buntag hangtud alas 4:00 sa hapon. Sama sa nauna nang selebrasyon, gisugdan kini sa pag-ampo ug adorasyon sa Blessed Sacrament, dayon ang animation sa IEC theme song kauban ang mga batan-on sa Mary Help of Christians Parish, ug lecture nga gipaambit ni Fr. Joel Caasi base sa talk nga una nang gihatag ni Bishop Baron sa Cebu niadtong Enero.

Pagkahuman sa pagpaambit, usa ka representante sa matag parokya ang naghatag sa ilang pamalandong sa mga pulong nga nakapatandog kanila base sa gipaambit ni Fr. Caasi.

Pagkahapon, gisugdan ug animation ang programa dayon gipakita ang testimonya pinaagi sa video sa Ponce family, ug testimonya ni Bro. Bert Silagan.

Gitapos ang IEC experience sharing sa Santos nga Misa nga gipanguluhan ni Arsobispo Romulo G. Valles, D.D. Matud ni Valles, “ang katuyuan sa pagselebrar sa one-day IEC experience mao nga masinati ang maanindot nga pagbati sa IEC ug maghatag ug dugang pagtagad sa pagka-simbahan sa tanan.”

“Pinaagi niini mapalawom ug mapalig-on pa unta kining atong pagka Simbahan, magdala sa kasinatian nga si Kristo anaa kanato ug sa pagdani kanatong tanan nga mapaduol kang Kristo diha sa Santos nga Eukaristiya.”

Iyang gihagit ang mga delegado nga unta ang sharing magdasig sa kinabuhi sa nangapil ug magpadayun sila sa pagpangalagad sa ilang tagsa-tagsa ka GKK.

Nagpasalamat si Fr. Marcelino Benabaye, SDB, ang kura paroko sa Mary Help of Christians Parish sa mga mingtambong gikan sa mga nagkalain-laing parokya sakop sa Most Sacred Heart Of Jesus Vicariate, ug sa mitabang kanila nga mahimong malampuson ang Vicariate IEC.