Ginoo, mitoo’g misalig ako kanimo!

Ika-27 nga Dominggo sa Ordinaryong Panahon
Heb. 1:2-3; 2:2-4/ Ps. 95/ 2 Tim. 1:6-8, 13-14/ Lucas 17:5-10

Sa unsang paagi nga malig-on ang imong pagtoo sa Dios aron ikaw motubo ug molambo usab niini?

Ang pagtoo dili usa ka butang nga dili klaro, dili matino, dili mahatagan ug kahulogan, o sa usa ka butang nga nagkinahanglan ug dako nga imahinasyon o di kaha pagkamasinugtanon nga walay paghuna-huna o “blind obedience.”

Sa pagkatinuod, ang pagtoo sukwahi niining tanan. Ang Pagtoo mao ang usa ka tubag sa pagsalig sa mga butang nga kasaligan, matinud-anon, tataw ug tinood gayud.

Aron makabaton kita ug pagtoo, kinahanglan kita nga mosalig ug mutoo sa usa ka tawo o butang nga angay natong tuohan.

Sa diha nga ang Dios mipadayag sa iyang kaugalingon ngadto kanato, Siya naghatag kanato sa “pasalig” ug “pagtoo” nga ang Iyang gahum ug presensiya ug himaya tinuod gayud, ug tingali mas labaw pa kay sa atong kasinatian sa mga natural ug pisikal nga mga butang dinhi sa kalibotan.

Ang mga butang sa atong palibot mamahimong mausab, apan dili gayod mausab ang Dios. Siya magmakanunayon, ilabi na diha sa Iyang mga pulong, ug sa kanunay magmatinud-anon sa iyang mga saad.

Busa makasalig gayud kita sa iyang walay kondisyon nga gugma alang kanato ug nga makalaum kita uban sa bug-os nga pagtuo nga siya mohatag kanato sa tanan nga iyang gisaad.

Si Jesus mao ang magpamatuod sa Dios nga ang iyang pulong mao ang kasaligan ug tinuod, nga ang iyang gugma walay paglubad ug walay kondisyon ug nga ang iyang gahum daku gayud ug walay kinutuban.

Sa laing bahin, ang pagtoo diha sa Dios mao ang susi alang sa pagwagtang sa mga babag ug mga kalisdanan nga makapugong kanato sa pagbuhat sa iyang kabubut-on.

Iya kita sa Dios ug ang atong kinabuhi dili na lamang para sa atong kaugalingon. Ang atong kalipay ug pribilehiyo mao ang pagsunod sa Ginoong Jesus ug sa pag-alagad diha sa gahum sa iyang gugma ug sa pagkamaayo.

Ug aron ang atong pagtoo mahimong epektibo, kini kinahanglan nalambigit uban sa pagsalig ug pagkamasulundon sa usa ka aktibo nga pagpasakop ngadto sa Dios ug andam sa pagbuhat sa bisan unsa nga iyang mga sugo.

Mosalig ug motoo ba ikaw sa grasya ug kalig-on nga gasa sa Dios aron sa pagtabang kanato sa pagbuntog sa tentasyon ug sa pagbuntog sa mga babag sa pagbuhat sa iyang kabubut-on? (Reb. Emmanuel G. Calumpong)