Ang Dakong Gugma ug Walay Kinutubang Kalooy sa Diyos

Ika-24 nga Domingo sa Ordinaryong Panahon
Ex 32:7-11, 13-14/ 1 Tim 1:12-17/ Lk 15:1-32

Unsa bay atong kinaiya ngadto sa mga tawo nga nahisalaag ang dalan? Sa mga tawo nga nakahimo ug dagkong kasaypanan? O sa mga tawong giilang makasasala ug sagbot sa katilingban? Kitang tawo usahay sayun lang kaayo alang kanato ang paghukom ug pagkondina sa atong isig-kaingun. Usahay pa gani ginabutang na nato sila sa kahon nga daw sa wala nay paglaum nga mabag-o pa. Apan niining ika-kawhaag-upat nga Domingo sa Ordinaryong panahon, ang atong mga pagbasa nagpadayag nga dili ingun niini ang kinaiya sa atong Diyos-kay ang Diyos mahigugmaon ug walay kinutuban ang iyang pagpasaylo.

Diha sa atong unang pagbasa gihulagway ang pagkamapasayloon sa Diyos bisan luyo sa Iyang kasuko sa mga kalapasan sa tawo. Ang mga Israelita nahisalaag ug nagsimba sa bulawan nga nating baka nga maoy ilang gipakadiyos, ug naghalad sila niini ug mga sakripisyo. Angay na unta silang laglagon, apan sa katapusan mipatigbabaw gihapun ang dakong gugma ug pasaylo sa Diyos. Mao usab kini ang mensahe sa Ebanghelyo. Ang tulo ka sambingay mahitungod sa nawala nga karnero, sa babaye nga nawad-an ug usa ka dako, ingun man ang istorya sa masupilon nga anak, adunay usa lamang ka mensahe. Ug kini mao nga dili gayud motugot ang Diyos nga adunay bisan usa sa iyang mga anak nga mahisalag. Sa kanunay andam siya sa pagpangita ug pagpas-as kang bisan kinsa nga nasayup ang dalan.

Kining maong kamatuoran konkreto nga nasinati ni San Pablo, ang giilang apostol ngadto sa mga hentil. Mao kini iyang gisaysay diha sa atong ikaduhang pagbasa sa iyang sulat ngadto kang Timoteo diin siya mismo miingun nga siya ang labing dautan nga makasasala, apan gikaluy-an siya sa Diyos ug nakadawat siya sa naghingapin nga gugma ug kalooy sa Diyos. Ang mga Phariseo kaniadto nagtoo nga ang kadaghanan sa mga tawo makasasala tungod kay sagad kanila dili makatuman sa daghang mga butang nga gisugo sa ilang balaod. Busa dili sila makigsandurot sa mga tawo, bisan gani ang pag imbitar kanila sa panimalay, o kaha ang pagpakig suod kanila bisan pa sa negosyo. Nan karon ilang nakita si Hesus nga nakig-uban sa mga tawo. Busa sila naiskandalo gayud ug nagyawyaw. Kay alang kanila, mas dako ang kalipay sa langit kung pahamtangan ug silot ang usa ka makasasala. Apan lahi ang pagtulun-an ni Hesus, tungod kay alang kaniya, mas maglipay ug magsadya ang langit alang sa usa ka makasasala nga nagbasol ug naghinulsol.

Mga igsoon usahay ang atong kinaiya dili layo sa batasan sa mga Pariseo. Kung kita makasala naglaom kita nga pasayloon kitang dayaun sa tawo nga atong nasad-an ug pasayloon kita sa Diyos. Apan nganung lisud man alang kanato ang pagpasaylo sa mga tawong nakasala kanato? Hinaot nga ang gipakita nga dakong gugma ug walay kinutubang kalooy sa Diyos, mag-aghat usab kanato nga mamahimong mahigugmaon ug mapasayloon. (Rev. Cristopher Alcayde)