Ang atong kaakuhan, kabus man o adunahan

Ika-26 nga Domingo sa Ordinaryong Panahon
Am. 6:1a, 4-7/ 1 Tim. 6:11-16/ Lukas 16:19-31

Tataw gayud ang mensahe sa sambingay mahitungod sa dato ug sa pobre nga si Lazaro: Ang mga mapalabihon, pagasilotan. Ang mahigugma sa salapi ug ang dili pagtabang sa uban makapahiagom kanato sa angay nga silot.

Kung ang tawo mahadlok nga mahimong kabus ug mangandoy nga mahimong adunahan, maglisod na kini pagbiya sa mga butang nga iyang mabatonan kung madato na kini. Apan angay natong hinumduman nga si Kristo natawo nga kabus ug nagpuyo nga kabus.

Ang matag-usa adunay katungdanan alang sa mga kabus. Sakit huna-hunaon apan diha mismo sa Simbahan adunay mga nagpuyo diha sa pagkaulipon sa salapi, katungdanan o kabtangan. Bisan sa mga relihiyoso, aduna gihapon nagapangita ug bahandi bisan pa nga misaad na sila sa pagbiya niini. Ug ilabi na sa mga ordinaryong ginsakopan sa simbahan, daghan gihapon ang mga nagpuyo nga mapahimuslanon sa mga panginahanglan sa uban aron lang makalamang ug makapuyo’g kinabuhi nga sobra sa gikinahanglan ug dili na kahibalo makig-angay sa uban. Mao kini ang eskandalo sa daghan nga nagtawag sa ilang kaugalingon nga mga Kristiyanos.

Sumala sa mga datos, ang gintang sa kabus ug adunahan nagakalayo na kaayo ilabi na dinhi sa atong nasod. Gikinahanglan gayud ang mga estruktura ug mga balaod nga makapakunhod niini. Apan usahay ang mga balaod mura ug pabor ra kaayo sa mga adunahan ug mga gamhanan. Ang mga adunahan nahimong mas adunahan pa gayud. Nga kung buot huna-hunaon ang nakadugang sa iyang pagkaadunahan gikan man gihapon sa kabus. Dugang pa niini makita usab nato ang paghatag ug pabor sa mga adunahan ug mga gamhanan kon makasala sila batok sa balaod. Dali ra gyod sila nga makalingkawas gikan sa kamot sa balaod, dili pa gani mapreso.

Tungod niini, ang simbahan nag-awhag kanato sa pagpaambit sa anaa kanato kay matud pa, wala kanatoy sobra ra ka kabos nga wala nay sarang ikapaambit pa, ug wala kanatoy sobra ra kadato nga wala nay sarang madawat pa. Mao kini ang atong kaakuhan. Mao kini ang diwa sa tinuod sa usa ka Kristiyano. Busa unsa man ang atong mga bili? Ang pagkaharuhay ba, o ang pagpaningkamot sa pakig-ambitay? Dinha sa atong kaugalingong katilingban aduna ba kitay pagpalabi sa mga kabos, ingon sa gipakita sa Ginoo? Dinha sa atong pagkakabos, ato bang nabati nga may ikapaambit pa kita? Unsa man? (Reb. Emmanuel G. Calumpong)