51 ka mga FLA couples mibag-o sa ilang Panaad

Kabahin sa pagsaulog sa “Tuig sa Yukaristiya ug ang Pamilya”, ang Archdiocese of Davao, Family and Life Apostolate (FLA) Director nga si Rev. Fr. Orlando (Orly) A. Angelia naghatag sa iyang pagpasidungog ug pagpasalamat ngadto sa mga FLA workers/facilitators sa nagkalain-laing parokya, Setyembre 3 sa San Pedro Cathedral, alas 9 sa buntag. Diha sulod sa Santos nga Misa gipahigayon ang “Renewal of Vows” sa 51 ka mga magtiayon, FLA workers nga anaa sulod sa 25–60 ka tuig sa ilang kaminyoon.

Matud pa ni Fr. Orly sa iyang homiliya, “kini usa ka espesyal nga panahon, angay nga ipasigarbo sa tanan kay ania kining maong mga magtiayon nagmatuod nga diha sa gugma sa Dios ug sa ilang pagkamatinud-anon sa usa’g usa ug sa pamilya , possible kaayo ang forever/faithful relationship” Giingnan ni Fr. Angelia sila nga ang ilang presensya buhing timaan sa pagkamatinud-anon sa Ginoo ngadto sa tawo. “Kamo ang buhing saksi sa pagkamagtiayon, padayon kamo sa dalan sa katarong ug sa inyong paghinigugmaay.”

Siya nagpahinumdum nga sulod sa kaminyoon kauban usab ang mga kalisdanan, ang tanan makaagi niining pagsulay sa kinabuhi apan dili kalimtan nga ang Dios wala gayud mibulag kaninyo.

Si Fr Orly usab nagpasalamat sa tanan nga mga FLA Workers nga nangalagad sa ubang pamilya ug gidasig niya ang tanang FLA Parish Coordinators sa pagpadayon sa ilang maayong buhat.

May pipila nga nagpaambit kung unsay sekreto nga nagkahiusa kanila sama nila Maximo ug Felicornia Casayas, Sacred Heart Parish, Obrero, nga ika-55 ka tuig nang minyo, pito ang mga anak ug dugay nang nangalagad sa FLA. “Kami nagkatigulang mas suod kaayo kay sa kaniadto nga batan-on pa kami. Nadawat namo ang grasya sa Ginoo ug walay puas nga mga panabang ni Birhen Maria ug gipangga usab kami sa among mga anak hangtud karon.”

Sila Sim Enrique ug Adriana Taotao, 60 ka tuig nang minyo, ug walo ang anak, mapasalamaton sa kalooy sa Dios sa kahamugaway sa pagpuyo ug pagtinabangay sa mga buluhaton sa panimalay. “Sacred Heart ang among devotion ug nagasimba sa kanunay.

Matud pa ni Tante, 78 ug Cresencia Navarra, 77, 49 tuig nang minyo, sukad 1972 pa sila nangalagad sa FLA, Sto. Rosario Parish, Toril. Sekreto nila ang pag-ampo sa kanunay ngadto sa Ginoo, “ampingan ang marriage vows, puy-an ang among gi-lecture sa pre-cana seminars tungod kay nindot ang grasya sa Dios, puno sa kalipay.”

Gihimo usab ang awarding sa “Outstanding Catholic Model Families” diin ang napili mao ang pamilya nila Zosimo ug Jelita Pastera. Nominee usab sila sa national level competition nga mahitabo sa Octobre 2016 sa Manila. Gigasahan sila og pito ka mga anak,ug aktibo nangalagad sa GKK ug sa ilang parokya. Matud pa nila ni Zosimo ug Jelita, ang grasya sa Ginoo mas bug-at pa kay sa mga kalisud nga ilang naagian.

First Runner-up naangkon sa pamilya nila ni Romeo ug Zoie Lestojas (St. Joseph the Worker Parish, Sasa), Second Runner-up sila ni Herminio ug Vilma Sayson Family (Holy Family Parish, Baliok). Ang tanang Parish Outstanding Catholic Model Families nga mipartisipar sa maong pagpili sa diocesan level gigantihan usab.

Ang pagsaksi sa mga giila nga mga modelo sa pamilya nakahatag og dugang kadasig,kalipay ug kalig-on sa pagpadayon sa misyon sa pagpakaylap sa pagkamahinungdanon sa sakramento sa kaminyoon, ug sa paghigugma sa kinabuhi ug pamilya. (Amie Desquitado | SJP SoCCom)