400 delegado mitambong sa OMPH Icon Congress

Human na ang Mindanao Regional Congress of the 150th Jubilee of Our Mother of Perpetual Help sa Redemptorist Church, Bajada, Davao City nga gipahigayon niadtong Septyembre 2-3, apan ang kalihokan nga gipangulohan sa mga Redentoristang Misyonaryo ug ilang mga lay cooperators subay sa tema: “Inahan sa Kanunay’ng Panabang: Larawan sa Gugma ug Kalooy” magpabiling buhi sa 400 ka delegado gikan sa Lipa, Manila, ug Cebu, Kibawe, Maramag, Iligan, Maco, Parokya sa Guihing, Sto. Niño Mission Station sa Nuing, Jose Abad Santos, Marian Parishes diri sa dakbayan sa Dabaw, kongregasyon sa madre, brothers, ug mga pari.

Ang “Marian Exhibit” niadtong Agosto 29 maoy niabli sa kalihukan diin ang Rector sa Davao Redemptorist Mission Community (DRMC) nga si Fr. Bert Cepe, CSsR ang maoy nag-abli niini.

Nagkadaiyang mga larawan sa Birheng Maria ang gipasundayag sa exhibit hilabi na ang mga larawan sa Virgin of the Passion og and Eleusa of the Passion. Duna usab mga nagkadaiyang imahen sa Inahan sa Kanunay’ng Panabang ng ginama sa lain-laing materyal. Dunay gipinta, gikulit, og gitahi.

Diha mismo sa Exhibit gipahigayon ang Marian Quiz Bee ug Poster Making Contest niadtong Agosto 31 ug Setyembre 1 diin mga eskwelehan sa Dabaw ang miapil. Champion ang mga partisipante sa Ateneo High School. Sila nakadawat ug Certificate of Participation, Plaque, ug P5,000.00. Ang mga batan-on sa Our Mother of Perpetual Help uban ang mga Redemptorist Fathers and Brothers mipasundayag sa ilang “flash mob” alang kang Maria sa Activity Center sa Abreeza Mall.

Miabot usab ang Pilgrim Icon sa Inahan sa Kanunay’ng Panabang sa Dabaw. Ang mga pari ug brothers nga mga Redemptorists personal nga misugat sa Icon didto sa Davao International Airport. Sa Misa pagka alas 5:45 sa hapon, ang mga delegado pormal nga giabi-abi ni Fr. Nico Perez, CSsR, ang Provincial Superior sa mga Redemptorist sa Province of Cebu. Human sa misa, ang “Gazing of the Icon,” nahitabo ug ang mga deboto sa ISKP giawhag sa pagpamalandong atubangan sa Icon.

“HARANA KANG MARIA” FINALE

Ang “Harana kang Maria,” usa ka konsiyerto diin nagpasundayag ang Redemptorist Church Choir, St. Blaise Choir, St. Alphonsus Choir, St. Joseph Chorale, ug mga Redemptorist Fathers and Brothers. “Gipasindunggan, gipasalamatan ug gipakahimut-ang ang atong Inahan sa Kanunay’ng Panabang ug mo-hunong usa sa pagpangayo og pakitabang ug mga hangyo gikan kang Maria,” matud pa ni Bro. Karl Gaspar, CSsR nga maoy mihatag sa mga closing remarks sa concert.

Tungod sa pagbusikad sa bomba niadtong Biyernes, ang mga deboto ug mga delegado sa kongreso nagsubo, nabalaka ug nag-ampo ngadto sa Inahan sa Kanunay’ng Panabang sa wala pa magsugod ang katapusang adlaw sa kongreso.

Ang Obispo sa Digos, Bp. Guillermo “Jimmy” Afable, DD, ang misaulog sa Santos nga Misa. Ang iyang “Viva Maria! Viva Hesus!” nahimong “chant” sa tibuok kongreso. Si Bp. Jimmy mismo mipadayag sa iyang kalipay pagkakita sa gatusan ka mga deboto ni Maria.

BP. AFABLE UG UBAN PANG KAPARIAN SA MARIAN CONGRESS

Ang mga conference talks mao ang musunod: “Phenomelogical and Theological Reflection on the Devotion to OMPH in the Philippines” ni Fr. Bert Cepe, CSsR, “Historical Perspective of OMPH Devotion” ni Prof. Dale Trazer Mansueto, “El Pueblo Amante de Maria”: Popular Religiousity vis-a-vis Marian Devotion ni Bro. Karl Gaspar, CSsR, “DEBO(MI)SYON: Devotion and Mission” ni Fr. Ino Cueto, CssR.

Matud pa ni Fr. Ino, ang pag-debosyon kang Maria dunay nakalambigit nga misyon nga mao ang pagtuman sa kabubut-on sa Dios diha sa atong mga kinabuhi isip nga Kristiyanos. Si Fr. Ino usab mipasabot sa tinoud nga kahulugan sa ngalan ni Maria ilalum niining titulo; nga si Maria inahan lamang sa tinoud nga “Perpetual Help” ug mao kana si Hesus.

Gikan ang ngalan sa Inahan sa Kanunay’ng Panabang, ang delegado nga si Perpetua Forgalidad, 60 anyos, head catechist sa Sto. Niño Mission Station sa Diyosesis sa Digos gibati angv naglangkob nga misyon sa iyang ngalan ug ang iyang pag-apil niining maong “Marian Congress.”

Gitapos ang kongreso pinaagi usab sa Santos nga Yukaristiya nga gipangulohan ni Fr. Nico Perez, CSsR. Sulod sa misa naghalad usab ug pag-ampo alang niadtong mga nanga-angul ug nangamatay sa pagpangbomba sa Night Market sa Roxas St. Iya usab nga gipahinumduman ang mga deboto ug delegado sa kongreso nga ang debosyon ngadto sa Inahan sa Kanunay’ng Panabang dili lamang mohunong diha sa atong pagpangyo ug pabor ug mga hangyo kang Maria apan ang pagdebosyon maghagit ug magbuhat sa kada deboto sa pagsangyaw sa kaayo sa Ginoo ngadto sa uban hilabi na niadtong mga nanginahanglan ug nawad-an sa paglaum. Viva Maria! Viva Hesus! (Bro. Jomil Baring, CSsr)