Team sa mga UNESCO scientists mi-abot sa Davao Oriental

Team sa mga UNESCO scientists mi-abot sa Davao Oriental
Mi-abot ang grupo sa mga siyentipiko gikan sa UNESCO sa miaging duha ka semana sa Davao Oriental aron ipahigayon ang validation sa Mt. Hamiguitan world heritage site sa San Isidro, Davao Oriental.

Gisusi sa grupo kung nagpabilin pa ba ang mga unique features nga nakapahimo sa Mt. Hamiguitan nga world heritage site, ug wala’y mga makadaut nga aktibidad sa heritage site. Gipasabot pa sa probinsyal nga panggamhanan nga magsilbi na kini nga regular validation sa team sa scientists. Mikuha ang group ug mga footages ug documentation, samtang subling giduso sa probinsiya nga nagapadayon gayod ang pagpaningkamot sa provincial government sa pagpanguna sa bag-ong Governor, Gov. Nelson Dayanghirang, ug ni San Isidro Mayor Justina Yu nga magpabiling protected area ang world heritage site. Nasayran nga kung aduna’y mga dili maayong mapanid-an ug mapamatud-an ang mga validators, mamahimo nga mabawi ang kadungganan nga gihatag sa Mt. Hamiguitan. Mikuyog sa team of scientists sa pagsaka sa Mt. Hamiguitan ang grupo usab sa Public Information Office (PIO) sa probinsya.

Panagbangi sa liderato sa mga lumad ang usa ka isyu nga mipatigbabaw sa diyalogo sa Brgy. Macambol
Kini mao ang duha ka mga tribal chieftain karon sa Brgy. Macambol, Mati City. Ang usa mao ang gi-ila sa katawhan sa barangay, samtang ang laing usa ang giduso sa Nat’l Commission on Indigenous Peoples (NCIP). Kini ang hinungdan karon sa bangi sa pamilyang Felizarta ug Mapinogos. Labot ni-ini, gipahayag pa ni Atty. Alejandro Aquino nga wala gayo’y mahitabo sa bangi sa pamilya kung ana-ay third party nga mao ang pagmina. Samtang gipahayag usab ni Ms. Marilyn Yumon sa NCIP nga gikinahanglan nga lingkuran una sa mga lumad, hilabi na sa nagbanging pamilya, ang problema ug hisgutan kini. Gipahayag usab ni Aquino nga motabang siya aron matigom ang nagbanging pamilya ug maresolba ang problema. Gihangyo sa katawhan si Yumon nga ipadangat ang ilahang mulo ngadto kang Sangguniang Secretary Julius Mabini, butang nga gipasalig usab ni Yumon. Kahinumdumon sa miaging balita nga unang gihisgutan sa naasoyng diyalogo ang sentimiento sa mga residente nga hunungon ang pagmina sa Salingcomot, Sitio Magum, sa maong barangay,tungod kay kini naka-apekto usab sa Pujada Sealscape and landscape, ug sa Mt. Hamiguitan nga gi-ila na nga UNESCO world heritage site, kon mga protected areas nga dili angay pasipad-an sa katawhan. Gawas pa ni-ini, gumikan matud pa sa pag-mina, apektado na kaayo ang panginabuhi sa mga maningisda sanglit gamay na lang ang ilahang makuha nga isda karon, samtang wala usab miagi ang buhat sa pagmina sa hustong proseso.