Simbahan nakig alayon sa drug rehabilitation program

Nagmiting sa ikaunom nga higayon ang mga miyembro sa “Sagop Kinabuhi II” o SKP II niadtong Agosto 17 St. Francis of Assisi Parish, Maa. Tumong sa miting ang pagpadayon nga paghisgot sa mga lakang ug kalihokan sa pagtabang sa mga lumulopyo sa Dakbayan nga nahilambigit sa ilegal nga droga. Ang miting gitambungan sa Regional Director sa TESDA Region XI nga si Engr. Gaspar Gayona.

Nadesisyonan nga pagahimuon na ang Assessment Training alang sa mga mohimo sa initial nga assessment sa mga gitawag nga Voluntary Submission for Reformation (VSR).

Ang unang batch pagahimuon karong September 3 alang sa mga representante gikan sa 14 ka barangay sa Talomo District ug Davao City Police Office.

Ang ikaduhang batch sa training himoon karong Setyembre 10. Kini pagaapilan sa mga representante sa 5 ka parokya nga sakop sa San Pablo Vicariate, LGUs, CSSDO ug uban pang ahensya nga apil sa SKP II.

Ang seminar ihatag sa Center Manager sa Davao City Treatment and Rehabilitation Center for Drug Dependents, Dr. Gene Gulanes.

Ang TESDA Region XI maoy mohatag sa budget sa seminar nga pagahimuon sa parokya sa Maa. Gihisgotan usab ang pormal nga paglusad sa SKP II kung makumpleto na ug mapirmahan ang Memorandum of Agreement tali sa mga ahensya nga sakop niining SKP II. Gihinaut nga mapahigayon kini sa dili pa matapos kining bulan sa Agosto. (Marian Carmela Raquel | SFA SoCCom)