Pagdawat sa Hagit sa Pagsunod Kang Kristo

20th Sunday in Ordinary Time
Jer 38:4-6, 8-10 | Heb 12:1-4 | Lk 12:49-57

“Wala ako mianhi aron pagdala’g kalinaw, kundili pagkabahin-bahin…” Daw sa dili kita makatoo nga kini gipamulong ni Hesus. Dili ba matud sa mga propeta kaniadto nga ang Mesiyas prinsipe man sa kalinaw? (Is 9:5-6; 1:6-9) Ug gani ang mga Anghel nanag-awit man ug “kalinaw sa kalibutan” (Lk 2:14). Ingun man si San Pablo nag ingun nga si Hesus maoy atong kalinaw (Eph. 2:14). Nan, unsa man diay gipasabot ni Hesus niining maong mga pulong?

Mga igsoon kining maong mga pulong sa atong Ginoong Hesukristo nagpahinumdom kanato nga dili gayud sayon ang pagsunod Kaniya. Gani matud pa sa usa ka awit panahon sa kuwaresma, “daghang tunok ang dalan nga agian mo…” Bisan diha sa atong yanong mga kasinatian makaingun gayud kita nga tinuod bitaw. Diha sa atong desisyon nga magpuyo ug matarong nga kinabuhi ug magbuhat sa maayo subay sa mga pagtulon-an ni Kristo ug sa Simbahan, usahay daghan kaayong mga babag ug pagsulay nga usahay maoy makapaluya kanato sa atong pagpaningkamot sa pagbuhat sa kabubut-on sa Diyos. Usahay dili kita masabtan sa mga tawo nga anaa sa atong palibot. Sama pananglit sa atong mga kabanay nga moingun: Nganung sige ra man ka ug yampungad anang Simbahan, wala man kay madawdaw diha? Nganong alagad-alagad man ka isip pangulo sa GKK nga wala man nay sweldo…? Ug gani aduna gayuy mga higayon nga ang mga bana ug asawa mag-away, ilabina kung dili masabtan sa usa ang katungdanan sa iyang kapikas sa kinabuhi.

Apan mga igsoon, isip mga binunyagang Katoliko ug mga sumusunod ni Kristo, kinahanglan nga andam kitang mobarog panahon sa mga hagit ug kalisdanan diha sa atong kinabuhing Kristohanon. Sama pananglit sa nasinati ni propeta Jeremias sa atong unang pagbasa. Panahon kadto sa gubat ug nakita niya nga wala gayud silay dag-anan. Desperado na ang mga tao ug halos mangamatay na sila sa gutom, apan ang mga opisyales buot gihapon nga makigsangka. Si Jeremias miingun nga mas maayo pa’g mo-surrender nalang sila aron dili maalaot ang katawhan. Apan wala mitoo kaniya ang mga opisyales sa kasundaluhan ug buot hinoon nilang patyon ang propeta. Maayo nalang kay naluwas pa siya sa usa ka langyaw nga si Ebed-Melech. Ang nahitabo kang propeta Jeremias dili imposible nga mahitabo sa mga nagsangyaw sa maayong balita ug nagabarog sa kamatooran. Usaha yang panglantaw natong kaayohan alang sa tanan, dili masabtan sa uban, ug kita pa hinoon maoy mamahimong dautan. Mao kini ang nasinati sa propeta.

Sama usab sa kasinatian sa mga taga Hebreo diin nakasinati usab sila’g mga pagpanglutos tungod sa ilang pagtoo. Daghan kanila nangalisang ug nangaluya tungod sa daghang hagit sa kinabuhing Kristohanon. Busa gidasig sila diha sa atong ikaduhang pagbasa nga dili kawad-an sa paglaum ug dili gayud mohunong sama sa usa ka atleta sa lumba ug dagan. Ang usa ka maayong atleta, bisan paman sa kainit o kalisod sa kompetisyon, mohatag gayud sa kinatibuk-an sa iyang katakus aron iyang makab-ot ang tumong nga kalampusan.

Kita usab sa atong pagkinabuhi isip mga sumusunod ni Kristo, dili unta kita maluya ni mawad-an ug paglaum ilabina sa mga panahon nga makasinati kita’g mga kalisdanan. Gipahimangnoan nga kitang daan ni Hesus, nga kung mosunod kita kaniya, dili kita maghandum nga makabaton kita’g kalinaw dinhi sa kalibutan, tungod kay adunay gayo’y mga elemento nga mobatok kanato, apan sige lang, padayon lamang gihapon kita sama sa usa ka atleta, kay sayud kita nga ang Diyos magapanalangin kanila nga magpabiling matoohon ug matinud-anon Kaniya, hangtud sa katapusang mga adlaw.

Isip mga sumusunod ni Kristo, andam ba kita nga modawat ug mosagubang sa mga hagit ug kalisdanan nga posibleng kabahin sa atong pagka-sumusunod ni Kristo? Hinaot pa unta! (Rev. Cristopher Alcayde)