‘Ordin pagka dayakono, usa ka gasa’

Atol sa kapistahan ni San Juan Marie Vianney ang patron sa kaparian, ang Arkidayosis sa Dabaw mipahigayon sa Ordin sa Pagka Dayakono, ngadto kanila Rev. Christopher Alcayde ug Rev. Emmanuel Calumpong nga gipangunahan ni Most Rev. Romulo G. Valles, D.D. inubanan ni Bp. George Rimando ug mga uban pang pari sulod ug gawas sa dayosis niadtong Agosto 4 sa San Pedro Cathedral.

Si Reb. Cris gikan sa parokya sa San Isidro, Lumondao. Ikaduhang sa lima ka magsoon, gipanganak siya niadtong Abril 3, 1988, ug nahimong convent boy kaniadto. Matud pa ni nanay Ofelia ang inahan niini, dili gayud masukod ang kalipay nga iyang gibati nga giordinahan na ang iyahang anak isip usa ka dayakono. Si Lovely ang kamagulangan sa magsoon, namulong nga iyang mahulagway si Rev. Chris isip usa ka responsable, mahigugmaon, maamumahon, ug sa kinatibuk-an makita nila kaniya ang hulagway sa usa ka amahan tungod sa pamatasan niini. Malipayon usab ang tibook pamilya tungod kay ang kamanghuran nilang lalaki buot man usab mosulod sa maong bokasyon ug karon seminarista na kini.

Si Reb. Emmanuel naggikan sa Dayosis sa Digos. Mas nailhang “Boyet” sa ilahang pamilya, gipanganak niadtong Pebrero 24, 1968 sa Malalag, Davao del Sur. Ika pito sa dose (12) ka magsoon, siya nagtrabaho isip Certified Public Accountant kon CPA sulod sa 19 ka tuig. Diha sa iyang pagpanrabaho sa opisina sa Obispo, napukaw ang iyang pangandoy. Sa maong trabaho iyang nakauban ang mga kaparian tungod sa iyang pag tuyok-tuyok sa nagkalain-laing mga parokya, aron sa pagsusi sa ilahang mga datos. Usa ka rason nga nagdesisyon na kining mag pari. Si kuya Dodong, ang ilang kamagulangan miingon nga malipayon kaayo sila nga giordinahan na pagka Dayakono ang ilahang igsoon, tungod kay “niadtong una pa unta gusto na gayud ni Rev. Emman musulod sa maong bokasyon. Mao usab kini ang gibating kalipay sa ilahang inahan nga si nanay Diosdada nga nahabilin sa ilang panimalay tungod sa gibati niining balatian. Sila usab adunay igsoong pari sa dayosis sa Digos nga si Fr. Reynaldo Calumpong, ang ikatulo sa magsoon nga mitambong sa maong ordinasyon,” dugang pa niya.

Sa iyang homiliya, si Abp. Valles nagkanayon nag, “kining gutloa karun, kining higayona, higayon sa kalipay. Kay pinaagi sa Diyos ang Arkidayosis sa Dabaw gigasahan ug gasa sa ordin sa pagka dayakono. Busa angay kita magpasalamat sa Dios ug ato silang i-ampo alang sa maong bokasyon.”

“Walay kabutangan ang tumang kalipay nga among gibati karun ni Rev. Cris, sa dakong gugma sa atong Ginoo nadawat namo kining gasa sa ordin sa pagka dayakono bisan pa sa among kakulangan. Tungod kaninyo ako na ako, tungod sa inyong gugma, nabuhi kanako ang gugma, gugma nga mao usab ang nakapadasig kanako nga mutubag sa tawag sa Ginoo,” matud pa ni Reb. Emman una pa man mahuman ang Misa.

Ang maong kasaulogan gitambongan sa daghang magtotoo nga maong nakapuno sa atong katedral, ug tungod sa kadaghan sa mga bisita gitunga sa duha ka bahin ang maong salu-salo isip pasalamat sa bag-ong naordinahan.; ang mga bisita ni Rev. Emman nagtapok sa pagkaon didto sa parokya sa Our Lady of Ascension, GSIS, Matina, ug sa San Pedro Cathedral auditorium ang mga bisita ni Rev. Cris. (Jane Imas | Editorial Asst.)