Mary Mediatrix Cathedral nagsaulog ug ika-65 nga kapistahan

Pinaagi kang Maria ngadto kang Hesus

Gisaulog sa Diyosesis sa Digos ang ika-65 nga patronal fiesta sa Mary Mediatrix of All Grace Cathedral. Atol sa kasaulogan gipahigayon sab ang 1st Regional Marian Crusaders Conference sa Cor Jesu Gym nga giapilan sa mga delegado gikan Cagayan de Oro, Mati, Malaybalay, GenSan, Kidapawan, ug uban pang lugar sa Mindanao. Ang panagtigom gibahin sa Dogmatization sa Mary’s Universal Mediation of Grace.

Ang lectures gihatag nila Fr. Roland Sayman (Historical Perspectives), Fr. Ronald Lunas (Theological Perspectives), ug Fr. Melvin Castro (Devotional Perspectives). Fr. Melvin gikan sa Diocese of Tarlac mao ang direktor sa Confraternity of Mary Mediatrix of All Grace.

Sa hapon, gibuhat ang panawduaw sa “Holy Door” sa Cathedral gikan sa Cor Jesu. Dayon misunod ang Konsagrasyon kang Hesus pinaagi ni Maria, Santos nga Misa ug pagpadala kon sending forth sa mga delegado. Paghuman sa Misa, giprusisyon ang imahe sa Mary Mediatix of All Grace.

Sa alas-9 nga Misa Pontifical nga gipanguluhan ni Bishop Guillermo Afable ug mga kaparian, gihatagan niya ug importansya ang pagka-rayna ni Santa Maria, ug ang sinugdanan sa pagtawag niini kaniya.

Matud pa ni Bp. Afable, nahimong Hari si Hesus sa paglansang kaniya sa krus, ug si Maria nahimong Rayna sa tiilan sa krus, sa pamaagi nga pag sulti ni Hesus, “Babaye ania ang imong anak, anak ania ang imong Inahan.”

Bago nahuman ang misa, ang kaparian uban ni Bp. Afable, mikonsagra sa ilang kaugalingon ngadto kang Hesus pinaagi ni Maria. (Lawrence Vidanes | MMP Correspondent)