IPA sa Lumad: Mutabang mi ninyo

Ang tribu Matigsalug sa Paquibato District ang maoy benepisyaryo sa scholarship program sa Indigenous People’s Apostolate. Sila usa lamang sa inilang onse ka tribu sa dakbayan sukad 2010 kauban ang Clata-Giangan Tribes, Sama Tribe, Tagabawa Tribe, Kagan Tribe, Iranun Tribe, Tausug Tribe, Maguindanaon Tribe (People of Maguindanao), Ata Tribe, Obu-Manobo Tribe, ug Maranao Tribe. (Photo: Boy Ugay)

Wala nay mas nindot pa sa kesa sa pagtabang nga tinuoray ug ang pagbati nga kini gidawat sa tiunay.

Singkwenta ka mga ginikanan sa mga lumad scholars nga ginatabangan sa Indigenous People’s Apostolate (IPA) mitambong sa binulan nga pormasyon gipahigayon didto sa Malabog Elementary School, Agosto 14. Layon sa capacity-building nga magkailhanay pa ang mga ginikanan sa mga bata pinaagi sa mga aktibidad ug mapalambo pa ang bag-uhay pa lamang nga gipormang Malabog Tribal Farmers Association.

Sumala pa sa ginikanan ug presidente sa asosasyon nga si Mr. Roel Baguio, aduna na siyay ideya kung unsaon pagmugna ug plano, “apan mas nakatabang pa ang gihimong Team Building Seminar with Action Planning sa Davao Verbum Dei Media Foundation aron mahan-ay pa ang mga plano. “Dapat diay naay target ug adlaw, kon petsa. Bilang presidente, kung unsay kasunduan, ipatuman, magtinabangay kita,” matud niya human ang sessions.

Gisugdan ang programa sa ecumenical prayer dayon ang talk nga “5 Stages of Organizational Development.” Ang unity games ug ang pagproseso nakapa aghat kanila nga importante diay ang komunikasyon ug pagplano, busa ang Action Planning maoy mitapos sa training.

Ang mga aktibidad mao ang musunod: 1) magtanum ug gulay sama sa okra, petsay, tanglad, lettuce, kamatis, kalabasa aron ibaligya sa palengke, ug ang halin mabahin sa capital ug panginahanglang pinansyal sa mga estudyante; 2) magpadaku ug mga kanding human muapil ug goat raising training; 3) magtanum ug Cacao, lubi ug rootcrops dayon ibaligya; ug 4) magtanum ug 100 ka seedlings sa Mahogany sa Sitio Crossing kilid sa sapa isip tabang sa kinaiyahan.

Malipayon ang staff nga si Ms. Joy Brillos nga nagkanayong “maningkamut gayud nga mangita ug pamaagi aron masuportahan ang mga plano.” Ug tungod kay limitado man ang budget sa IPA, “mangita mi ug pamaagi nga maka link sa mga concerned agencies sama na lamang sa pagsolicit ug seedlings, ug uban pa.”

Una pa lamang kini sa hut-ong sa mga seminar nga ipahigayon. Pagahimuon ang educational farm trip karong Setyembre 10 ug ang theatre workshop sa mga scholars sa musunod nga bulan.

Ang IPA nga gipangunahan ni Fr. Jun Acedo, usa lamang sa pastoral agencies sa Simbahan nga nagaatiman sa mga lumad nga taga Paquibato. Isip kabahin sa Lumad Education Program, 124 ka mga estudyante ang ginatabangan sa pagtungha sa elementarya, hayskul ug college. Alang sa donasyon, contact lang sa 0908 609 8140 o sa St. John the Baptist Parish, Lasang (Fr. Jun Acedo).

Save