Feeding sa adlaw’ng natawhan sa St. Camillus Hospital Director gilusad

Feeding sa adlaw’ng natawhan sa St. Camillus Hospital Director gilusad
Nagpahigayon ug gilusad sa St. Camillus Hospital of Mati ang Feeding program alang sa kabataan sa usa ka barangay sa siyudad sa Mati agi’g pagsaulog ni hospital director Fr. Marven G. Ruyeras, MI (Ministers of the Infirm) sa iyang ika-35 nga adlaw’ng natawhan niadtong Hulyo 23, 2016.

Human sa kasaulogan sa Santos nga Misa alas 8:00 sa buntag sa kapilya ni San Miguel Arkanghel sa Brgy. Bobon, misunod ang ribbon-cutting ug pagpakaon sa kapin 50 nga mga bata, sa unang higayon pa lang. Ang naasoy’ng feeding program ang nagtinguha sa pagsulbad sa problema sa malnutrisyon sa mga gagmay’ng bata pinaagi usab sa partisipasyon sa mga tinun-an sa Don Bosco Training Center ug mga benefactors sa parokya sa Mahal nga Kasingkasing ni Hesus sa Dahican, Mati City. Samtang nagtabang sa mga donasyon ug nagsaad usab sa ilang makanunayong pag-abag ang pipila ka sakop sa Lay Camillian Family (LCF) ug staff sa Community Based Health Care Program (CBHCP). Ug kabahin aktibidad sa feeding, sumala pa ni Camillian Sister Didith G. Olivar, namatikdan gyud ang dakong kalipay ug pasalamat sa mga inahan nga mikuyog sa ilang mga anak sa pagdawat sa masustansyang pagkaon.

Gipasabot ni Fr. Marven sa iyang wali nga ang Feeding Program gituyo pagmugna aron matabangan ang mga nanginahanglan. Gidapit usab sa pari ang ubang sakop sa katawhan sa Diyos nga buot moapil sa pundok sa LCF. Matud pa niya nga sukad karon, ilaha nang gilusad alang sa tanan ug dili lamang para sa mga staff sa hospital. Sa laing bahin, kahinumduman nga usa pa ka seminarista si Fr. Marven dihang gidestino na siya sa Dyosesis sa Mati ug giordenahang diyakono ni Obispo Patricio H. Alo, unya giordenahan siyang pari sa iyang natawhang lungsod sa Kitaotao, Bukidnon niadtong Disyembre 11, 2009. (Olive Gimeno)

‘Pusong Kamilyano, patuloy na nag-aalay sa inyo’
Kini ang napiling tema sa pagsaulog sa St. Camillus Hospital sa ilang patronal fiesta sa miaging bulan. Tulo ka adlaw ang gitutukan sa kasaulogan nga nagpunting sa: (1) kaayohan sa mga masakiton (Mass for the Sick), (2) relihiyosong bokasyon, ug (3) pagpalambo sa Lay Camillian Family (LCF) of Mati. Managlahing departamento sa hospital ang mi-sponsor sa gipahigayon nga programa. (Sumpay sa sunod nga pagbalita)