Dili Sayun ang Pagsunod Kang Kristo

23rd Sunday in Ordinary Time
Wis 9:13-18/ Phlm 9-10,12-17/ Lk 14:25-23

Sagad kanato, diha sa atong pagkatawhanon, nangandoy gayud kita ug hayahay nga kinabuhi. Aduna bay tarong nga tawo nga boot magkalisud lisud sa kinabuhi? Tingali wala gayud. Apan si Hesus wala mipasalig kanato ug kaharuhay o kahayahay sa kinabuhi. Isip mga binunyagang Katoliko, nahimo kitang mga sumusunod ni Kristo. Ug diha sa atong pagkasumusunod ni Kristo, gihagit kita sa pagsunod usab sa iyang mga panudlo ug panig-ingnan. Kini usa ka kaakuhan o tahas nga sayud kita nga dili gayud lalim. Kay matud pa lagi, “dili sayun ang pagsunod kang Kristo.”

Mao kini mensahe sa atong Ebanghelyo karong Dominggoha. Matud mismo ni Hesus, adunay tulo ka butang nga angayan natong hinumduman kung gusto nato nga mamahimong tinuod nga Iyang mga sumusunod. Una, miingon siya, nga kung kinsa kadtong dili magdumot sa iyang amahan, inahan, asawa, ug mga anak, ingun man sa iyang kaugalingong kinabuhi, dili mamahimong Iyang disipulo. Wala kini nagpasabot nga gusto ni Hesus bungkagon ang matag pamilya.

Ang punto mao nga ang atong tawhanong relasyon bisan paman diha sa atong pamilya, kaparyentihan ug kahigalaan dili unta makaguba ni makababag sa atong relasyon ug pakigsuod sa Diyos. Usahay man gud ang mahitabo, makabuhat kita’g dili maayo sama sa inhustiya ug pagpanikas, ingun man pagpanglupig sa uban tungod sa atong subra nga pagpalabi sa atong pamilya ug kaha mga miyembro sa atong banay. Sama pananglit sa atong paghatag ug pabor sa atong paryente ug higala tali sa usa ka kabus ug wala nato mailhi nga tawo. Niining paagiha atong gipalabi ang paghigugma sa atong kaugalingong pamilya labaw kay sa Diyos. Ikaduhang kondisyon nga gihatag ni Hesus mao ang pagpas-an sa atong krus. Sagad nato kining gisabot isip pahimangno nga kinahanglan atong sagubangon ang mga pag-antus sa kinabuhi. Apan labaw niini, kini nagpasabot nga kung boot natong mamahimong tinuod nga sumusunod ni Kristo, kinahanglan nga maantigo kitang mopadayag sa atong paghigugma sa uban, bisan pa’g nagkahulugan kini sa atong kabahin ug pagsakripisyo ug pag-antua. Kay sumala pa sa ginaingun, matawaawag lamang kitang tinuod nga Kristiyano kung andam kitang motahan sa atong kaugalingon alang sa kaayohan sa uban.

Ikatulo, si Hesus miingun nga dili kita mamahimong iyang disipulo kung dili nato talikdan ang tanan. Niining bahina atong mabati nga seryoso gayud si Hesus tungod kay ang iyang gipangayo dili lamang usa ka bahin kung dili tanan gayud. Kining maong pahimangno ni Hesus dili lamang alang sa mga relihiyoso o sa mga kamadrihan ug kaparian. Kini alang gayud sa tanan nga boot mamahimong angayan nga sunusunod Niya. Kining maong pahimangno nagpahinumdum kanatong tanan sa atong kinaiya tali sa mga bahandi niining kalibutan, tungod kay usahay, hilabihan ang atong pagpaningkamot sa pagtigum ug mga bahandi ug katigayuhan, apan mahikalimot kita sa paglingi sa atong mga kaigsoonan nga nanginahanglan.

Usahay subra-subra ang atong pagtigum alang sa atong kaugalingon samtang ang uban natong kaigsoon wala gayud intawo’y madaw-daw aron sila makakaon. Nan kining ikatulong kondisyon naghagit kanato nga agi’g pagtalikod sa mga kalibutanong butang, kat-unan ta ang pagpaambit sa atong katigayunan ngadto sa mga nagkinahanglan.

Tungod niining maong mga punto, tingali malisdan kita ug dili dayun nato masabtan kining maong gipangayo ni Hesus, busa kinahanglan natong pangayuon sa Diyos ang kaalam nga gihisgutan diha sa atong unang pagbasa. Usa usab ka pananglitan ang gihatag kanato sa atong ikaduhang pagbasa diha sa sulat ngadto kang Philimon- usa kini ka maayong ehemplo sa pagpadayag sa gugma ug pagpasaylo ug ang dili pagpagapos sa mga yutan-ong butang.