Ang sigpit nga dalan maoy atong pagalaktan

Ika-21 nga Domingo sa Ordinaryong Panahon
Is 66:18-21/ Heb 12:5-7, 11-13/ Lk 13:22-30

“Diyutay lang ba ang maluwas?” Mao kini pangutana sa usa ka tawo ngadto kang Hesus diha sa atong Ebanghelyo karong Domingoha. Apan inay tubagon ang maong pangutana, si Hesus misulti hinoon kanila sa angay nga buhaton aron nga makasulod sa gingharian sa langit – “”g ang kinahanglan lamang mao ang pagpaningkamot sa pagsulod sa sigpit nga dalan.”

Ang pangutana karon, unsa kahay angay natong buhaton aron kita makasulod sa sigpit nga dalan?

Usa lamang ka butang ang gikinahanglan, kay sigpit man ang dalan, nan kinahanglan nga atong pagamyan ang atong kaugalingon. Kinsa kadtong subrahan kadagko dili gayud makasulod bisan pa ug unsa nga pamaagi ang ilang himoon. Wala kini nagpasabot nga kadto lamang mga pisikal nga payat ug dili ang mga tambok maoy makasulod. Ang punto mao nga dili gayud kita mamahimong mga sumusunod ni Kristo kung puno kita sa atong kaugalingon, ilabina sa mga kaugalingong paghandum sa gahum ug bahandi, lakip na ang pangandoy nga mamahimong una ug labaw sa tanan. Dugang pa niaana, dili usab kita makasulod sa sigpit nga dalan kung kita adunay daghang dala nga mga bagahi, sama sa bagahi sa pagdumot ug dili pagpasaylo, ug uban pang mga bagahi sa atong pagpakasala. Kini sila maoy makapahoot kanato inig agi nato sa sigpit nga dalan. Sa ato pa, kabahin sa atong pagpagamay sa atong kaugalingon mao ang pagsalikway usab sa sala, ug pagpaningkamot sa paglikay sa mga kahigayunan sa pagpakasala.

Nan ang sunod nga pangutana mao kini, kinsa raman kahay makasulod sa maong sigpit nga dalan? Ang mga Hudiyo kaniadto nagtoo nga sila lamang ang maluwas kay sila lamang ang piniling katawhan sa Diyos. Tungod niining maong panglantaw ilang gikasilagan ang mga dili Hudiyo ug dili gani sila makighimamat o makigahalubilo kanila. Ilang gitoohan nga diyutay lamang ang maluwas, ug sila lamang kini. Apan si Propeta Isaias diha sa atong unang pagbasa nag ingun nga tamukon sa Diyos ang tanang katawhan gikan sa tanang mga nasud sa kalibutan, moabot sila ug ilang makita ang himaya sa Diyos. Nan sa ato pa, tataw nga gipadayag nga ang gingharian sa Diyos, dili lamang alang sa Israel kundili alang gayud sa tanan.

Apan bisan tuod alang kini sa tanan, sa gikaingun na, dili kini sayun tungod sa paga-agian nga sigpit nga dalan. Gani ang ikaduhang pagbasa gikan sa sulat ngadto sa mga taga Hebreo, nagpahinumdum man kanato nga kinahanglan nato antuson ang mga kalisdanan bisan pa ug usahay dili nato kini masabtan. Isipon na lamang nato nga ang mga pagsulay sa atong Kristohanong kinabuhi, mga pamaagi lamang sa Diyos aron kita maandam sa pagsubay sa sigpit nga dalan. (Rev. Cristopher Alcayde)