Ang Magpataas Ipaubos

22nd Sunday in Ordinary Time
Sir 3:17-18,20-29/ Heb 12:18-19,22-24/ Lk 14:1.7-14

Usa ka tawhanong tendensiya mao nga ganahan kita nga pasidunggan. Gusto kitang mamahimong inila diha sa atong katilingban, ug isipon nga mas labaw kaysa kadaghanan. Kini kabahin sa tawhanong panginahanglan nga kahatagan ug importansiya ang atong kaugalingon. Tingali makaingun kita nga natural kini sa tawo, apan kini bantayanan, tungod kay usahay mao kini makapahimo sa tawo nga mapahitas-on ug ubos ang pagtan-aw sa uban. Ang tema sa atong mga pagbasa karong Dominggoha nag-awhag kanato nga maoy atong batunan ang hiyas sa pagkamapaubsanon.

Diha sa unang pagbasa gikan sa libro ni Sirach, atong madungog o mabasa ang usa ka maalamong tambag sa pagpaubos sa tanan natong buhaton, aron sa ingun kahimot-an kita sa Diyos ug sa atong isig-kaingun. Kinsa bang tawhana ang ganahan sa tawong mapahitas-on o garbuso? Wala gayud. Kung adunay tawo nga mag punay na lamang ug hisgot mahitungod sa iyang mga hiyas ug katakus, o kaha sa iyang mga nahimo o nakab-ot sa kinabuhi…kinsa bay ganahan maminaw sa maong tawo? Tingali bisan ang iyang suod nga higala dili boot mamati kaniya.

Diha sa atong Ebanghelyo pagpaubos usab ang mensahe nga tataw gipadayag niini. Gani matud sa Ebanghelyo ang si bisan kinsa nga magpataas ipaubos ug ang magpaubos ipataas. Sama pananglitan sa usa ka kumbira diin sagad sa mga dinapit boot gayud molingkud sa labing pinasidunggan nga lingkuranan. Ang pahimangnu ni Hesus mao ang dili pagpili sa pinasidunggang dapit aron dili kita maulawan. Gani misugo pa siya nga mas labing maayo pa nga maoy atong pilion ang labing ubos nga dapit ug pasagdi nga ang nagdapit kanimo maoy mopalingkud kanimo sa hustong dapit nga gitagana alang kanimo.

Kitang mga Pilipino usahay aduna kitay kinaiya nga masubrahan ang atong pagpaubos sa kaugalingon hangtud sa punto nga dili na usab makatabang. Kini dayag diha sa atong hilabihan ka pagkamanggiulawon. Adunay mga higayon nga unta aduna kitay mabuhat nga maayo aron pagtabang sa uban apan maulaw kitang moboluntaryo kay mahadlok kitang ingnun nga nagpa alig-alig o kaha papapel. Usahay tungod sa hilabihan natong pagpaubos, taguan na lamang nato ang atong mga katakos ug talento. Gani kung dayegon ta tungod sa atong mga hiyas, usahay dili kita maantigong modawat sa maong pagdayeg. Kini mga pipila lamang ka pagpadayag sa maling pagpaubos sa kaugalingon. Mga igsoon ang tinuod nga pagpaubos sa kaugalingon nagsukad sa kamatuoran nga wala kitay mahimo kung wala ang Diyos ug ang tanan nga ania sa kalibutan ug ang tanan nga giisip natong atoa iya sa Diyos. Busa wala gayud kitay angayan nga ikapanghambug. Wala kitay katungod nga mamahimong mapahitas-on. Ug atong hinumduman nga ang si bisan kinsang magpataas ipaubos, ug ang magpaubos ipataas.