Skills Development Program sa ASAC Giplanuhang Ipa-abot sa GKK

PAG-APOD APOD sa mga starter kits sa TESDA graduates sa Refrigeration, repair and maintenance NCII gikan San Pablo Vicariate; San Pablo Parish – Juna Subdivision, Our lady of Lourdes Parish-Bangkal, Ascension of the Lord Parish – GSIS Matina, St. Francis of Assisi Parish-Ma-a, ug San Isidro Labrador Parish.

Giplanuhan karon sa Social Action Center sa Arkidayosis sa Dabaw nga ipa-abot ngadto sa Gagmay’ng Kristohanong Katilingban (GKK) ang skills development program aron makabenepisyo ang daghan pang mga nanginahanglan ug pabansay sa panginabuhian.

Gibutyag sa director sa Archdiocesan Social Action Center (ASAC) Rev. Fr. Leonardo Dublan, Jr., nga kinahanglang sutaon ang mga posibilidad nga pagahimoon aron nga mapalapdan ang maong serbisyo ug mas daghan ang makapahimulos niini. “We must make it more efficient,” si Fr. Dublan misumpay.

Mikabat sa 215 ang mga benepisyaryo gikan sa 7 ka mga bikaryato sa nagkalain-laing skills training nga gipahigayon sa Technical Education and Skills Development Authority (TESDA) ug sa Department of Labor and Employment (DOLE) sa Rehiyon XI. Gipasabot ni Fr. Dublan nga aduna usahay problema sa komunikasyon tali sa mga bikaryato hinungdan sa pagkadelatar sa implementasyon sa programa.

Alang sa tuig 2016, laing 7 ka mga bikaryato ang magpadala ug mga kandidato alang sa nagkalain-laing mga skills training. Sa maong programa, 2 lamang matag parokya ang ipadala sa matag skills training, sama sa mosunod: Sta. Ana vicariate – Electrical Installation (ongoing) and maintenance / Electronics; Immaculate Conception Vicariate – Welding; St. James Vicariate – Motorcycle repair (Batch II) / Food Processing (on going); San Pedro Vicariate – Welding / Bread and Pastries; San Pablo Vicariate – Baking (on going) / Motorcycle Repair; Sto. Rosario Vicariate – Cellphone repair (nahuman na); ug Sacred Heart of Jesus Vicariate – welding.

Lakip sa skills training mao ang pagpang-apod-apod ug mga tool kits o starter kits aron nga makasugod na sila sa ilang panginabuhian.