Kasaysayan sa San Alfonso Parish

Ang mga dapit nga nahisakop karon sa parokya, kabahin kanhi sa Parokya sa Inahan sa Kanunay’ng Panabang nga gidumala sa mga pari nga Redemtorista sa Bajada, dakbayan sa Dabaw. Ang maong parokya namugna niadtong Hunyo 1972 ubos sa pagdumala sa unang kura, si Fr. Dominic McKeena, C.Ss.R. Gipahinungod sa Inahan sa Kanunay’ng Panabang ang maong parokya tungod kay tigpakaylap man ang mga Redemtorista sa debosyon niini. Naghimog sila’g mga misyon sa mga dapit sa Mandug ug Callawa diin ang ilang gihimong sentro mao ang Sitio sa Fatima, sa upper Mandug. Niadtong mga tuiga usab, nagsugod pagpamalhin sa ilang mga bag-ong pinuy-anan ang mga homeowners sa DDF Village.

Sa hinay-hinay nabuhi ug mibarog ang mga Gagmayng Kristohanong Katilingban (GKK) sa maong mga dapit. Human sa napulo ka tuig, gibahin sa mga paring Redemtorista ang parokya sa Inahan sa Kanunay’ng Panabang ngadto sa tulo: ang upper Buhangin barrios (UBB) nga naghugpong sa mga GKK sa Coog, Mandug padulong sa Callawa ug Katualan; ang DDF Village (nga adunay sobra sa usa ka libo nga balay) ug ang Lower Buhangin Barrios (LBB) nga hugpong sa mga GKK sa Bajada, Buhangin ug Tigatto.

Wala madugay nahimong sentro sa mga lituryanhong kalihokan ang DDF Chapel alang sa katawhan sa UBB ug nagpadayon kini sulod sa 20 ka tuig. Sa maong panahon gipahigayon ang mga GKK Masses ug ang padayong pag-umol sa mga lideres ug ginsakpan sa mga GKK. Adunay mga Parish Workers nga nagtabang sa mga kaparian sa pagpakaylap sa mga programa ug mga kalihokan sa parokya. Gitutukan usab ang pagpili ug pagbansay sa mga pangulo sa mga GKK/Kapilya ug sa pag-abag kanila sa ilang mga buluhaton. Miabag usab ang pipila ka Redemptorist Seminarians ug mga Maryknoll Missionaries sa pormasyon sa mga GKK’s ug mga kabaryohan lakip ang pagpahigayon sa liturhiya, mga sakramento ug mga programa.

Sa tuig 1987, gimugna ang bag-ong parokya sa Buhangin, ang St. Mary of Perpetual Rosary Parish, ug nahimong kabahin niini ang mga GKK sa Panorama ug Tigatto. Tungod niini nahilayo ang uban sa UBB sa Buhangin ug Bajada, apan nagpabilin nga buhi ug madasigon ang mga GKK sa UBB ug DDF nga nakilambigit sa mga parokyano sa Bajada.

Nagpadayon ang mga “bi-monthly” nga GKK masses, mga education/formation programs, ingon man ang senemanang Misa sa Domingo sa DDF Chapel. Gawas sa mga paring Redemtorista nga nagpuli-puli sa pagmisa sa DDF Chapel, mihatag usab sa iyang panahon ang usa ka paring Jesuita, si Fr. Romeo Serrato. Sa naghinapos na ang siglo, sa matag misa ni Abp. Capalla atol sa kapistahan sa DDF Village, kanunay nga nahisgotan ang plano sa pagmugna ug bag-ong parokya dapit sa DDF ug UBB. Ug nakompirma kini atol sa iyang pagmisa sa pista sa DDF niadtong tuig 2000. Aron masayran ang mga utlanan ug ang pag-uyon sa katawhan sa pagahimoong bag-ong parokya, ingon man usab aron mahan-ay ang “profile” niini usa ka survey ang gipahitabo.

Tuig 2001, gihimo ang konsultasyon tali sa Arsobispo ug sa mga Redemtorista isip pagpangandam sa pagtukod sa bag-ong parokya. Gipahibalo ni Abp. Capalla niadtong Semana Santa 2001, ang pagtudlo kang Fr. Leonardo “Bong” Dublan, DCD, isip administrador sa mahimong bag-ong parokya.

Ginganlan ang bag-ong parokya pinaagi sa pagbunot. Ang matag GKK nagtuboy ug santo ug gisulod sa sobre ug human ang pag-ampo sa giya sa Espiritu Santo usa ka inosenting bata ang gipabunot. Si San Alfonso Ma. De Liguori, ang founder sa mga Redemtorista, mao ang nahimong patron sa bag-ong parokya.

Pormal nga misugod si Fr. Leonard Bong” Dublan sa iyang katungdanan niadtong Hunyo 2001. Gisugdan dayon ni Fr. Bong ang mga buluhaton pinaagi sa pag-organisa sa Adhoc Committee, nga adunay nagkalainlan nga mga “sub-committee” base sa mga buluhaton, lakip niini ang Site Acquisition Committee, kay wala pa may klaro nga site alang sa bag-ong parokya. Kasamtangang mipuyo si Fr. Bong sa usa ka balay sulod sa DDF Village nga mao ang gihimong kasamtangang sentro sa bag-ong parokya. Kay wala pa may imahen ni San Alfonso, mihatag ang mga Redemtorista ug pipila ka kopya sa hulagway ni San Alfonso ug giapod-apod kini sa mga kapilya nga sakop sa bag-ong parokya. Naghulam usab ug estatuwa ni San Alfonso ang mga lideres (nga gipangulohan ni Bro. Dante Bontia) sa Redemptorist aron adunay magamit sa unang kapistahan niadtong Agosto 2, 2001. Gipahiluna ang maong imahen sa Kapilya sa Sagrada Familia sa DDF. Apan sa dihang namugna ug nakasugod na ang usa ka tuig nga programa mipahibalo si Fr. Bong Dublan, nga mopahulay una sa mga buluhaton sa local nga simbahan. Mingpuli kaniya sa hamubong panahon si Fr. Benjie Nacario.

Ang Administrative Committee nakigkoordinar sa Archbishop’s residence alang sa mga pari nga magmisa sa Domingo ug magsaulog sa mga sakramento lakip ang mga “fiesta mass” sa mga GKK. Nahimong hagit usab ang pagtubag sa mga hinanaling panginahanglan sa sakramento ilabi na sa masakiton. Nagpuli-puli ang mga kapariang dayosesan ug mga Redemtorista sa pagtubag sa panginahanglan sa bag-ong parokya, apil na sa mga sakramento. Lakip kanila sila si Fr. Nards Vicente,, Fr. Jimmy Gamboa, mosgr. Mat Gorgonio, Fr. Henry Campeon, Fr. Toto España ug Fr. Edsel Paloma.

Nahimong pormal na gayud ang pagmugna sa parokya sa dihang gihimo ni Abp. Fernando Capalla ang “Decree of Erection” sa bag-ong parokya ug gitudlo ni Fr. Maximo Sarno, DCD, isip unang kura paroko, niadtong Hunyo 1, 2003.

Misugod siya sa pagserbisyo ug mipuyo sa bag-ong nahuman (apan wa pay pintura) nga kumbento sa DDF Chapel. Nahuman ang iyang termino nga tulo ka tuig sa Mayo 2006. Sulod sa maong termino, nadawat ang donasyon sa lote alang sa bag-ong parokya gikan sa pamilya Lorenzo (usa sa mga nasugdan nga proyekto sa panahon ni Fr. Bong Dublan), apan wala pa nakamugna ug lakang sa pagtukod sa gambalay sa bag-ong simbahan. Nakapatindog usab siya ug gamay nga “meeting/seminar hall” tapad sa kumbento sa DDF ug nakapahimo ug dugang lingkoranan sa kapilya. Gawas sa pagsaulog sa mga sakramento ug sa pagpahiluna sa mga sistema sa bag-ong parokya, personal usab niya nga gitutukan ang pag-umol sa mga katekista ug ELM’s.

Hunyo 1, 2006, gipuli kaniya si Fr. Loreto ‘Bebs’ Bastasa, nga gikan sa iyang pagserbisyo sa parokya sa Malabog. (Bro. Dante Bontia)