‘Drugs pa more to Drugs no more’ scenario

Gilauman sa Davao Oriental PNP nga sulod sa unom ka bulan mahitabo na kini nga ‘scenario.

“Ang 6-month period nga gi-target sa Duterte administration mahimo gayud,” sumala pa kang Davao Oriental Police Senior Supt. Harry Espela, human sa drug clearing operation sa munisipalidad sa San Isidro di palang dugay diin 300 nga mga drug dependents ang mi-surrender sa San Isidro PNP ug kang Mayor Justina Yu.

“Hinaut nga seryoso gayud kamo sa pag-ampo,” matud pa ni Espela, “Ang gobyerno buot motabang kaninyo sa pagsugod og bag-ong kinabuhi uban sa inyong mga pamilya.”

Gisulti pa sa opisyal nga human sa ilang pag-ampo sa gobyerno, bantayan ug i-monitor sila aron masiguro kung tinuod gayud ang ilang pagtahan sa kabag-ohan. Miapelar usab si Espela sa mga “surrenderees” aron ibutyag ang tinubdan sa ilang mga gamit o ang mga ‘supplier’.

“Tabangi mi aron mabutang na gayud sa katapusan ang kadaotan sa droga. Wala moy ikahadlok tungod kay confidential ang among pagtrato sa tanan,” maoy gipasalig niya sa mga hingtungdan.

Tulo ka adlaw human sa “drug clearing operation” sa San Isidro, ang munisipalidad sa Tarragona ang misunod. Si Tarragona local chief executive Mayor Nestor Uy nagbutyag nga dili niya gusto nga madala sa iligal nga droga ang iyang mga ginsakupan.

Nalipay siya, matud pa nga ang mga drug dependents ang mitamod sa panawagan sa pagbag-o, apan gipasabot usab niya nga ang mga droga nga gigamit sa mga dependents wala maggikan sa Tarragona, ug kini ang ilaha pang gisusi.

Sa siyudad sa Mati, ang drug dependents mikabat na ug 200 kabuok sa duha lamang ka barangay, ug padayon pa ang ilahang pag-iphanay. Human sa ilang pag-ampo sa panggamhanan, si Punong Barangay Danny Macaubos sa Brgy. Central naghangyo sa mga “surrenderees” sa pag-report sa barangay kas-a matag semana.

Ang mga munisipalidad sa Cateel ug Baganga ang nakatala usab og gatusan ka mga gumagamit og droga nga misaad sa pagbiya sa ilang mga dautang gawi. Ang ubang mga munisipalidad ang nakasugod na’sab sa ilang kaugalingon nga drug clearing operation. Atubangan niining tanan, malaumon si Espela nga sulod sa unom ka bulan, base sa kooperasyon nga gipakita sa mga drug users, usa ka drug-free Davao Oriental ang dili gayud halayo nga makab-ut.