Bibliya matag pamilya gihatag sa Malabog

Mibisita sa San Roque Parish, Malabog ang grupo sa Daughters of Saint Paul nga sila Sr. Fedirica Dalaguit, Rosselle Caballero, Merie Melencion, ug Mercidita Paulino aron ipahigayon ang Bible Seminar alang sa 119 ka mga Pangulo sa GKK labi na sa Pangulo sa Liturhiya, Pangulo Sa Panudlo, ug Lectors and Commentators niadtong Hulyo 16.

Gihisgutan ang “Kasaysayan sa Kaluwasan ug Pulong sa Dios” ug “Unity of the Old and New Testament.” Tumong niini nga matagaan ang matag pamilya ug Bibliya ug makahibalo mobasa niini. “Miari ang grupo sa Malabog aron ang Balaang Kasulatan makaabot sa tanan, labaw na kadtong mga walay bibliya hangtod karon.”

Nagpasalamat kami nga daghan ang nangabot ug nangattend tungod daghan ang makabasa sa pulong sa Dios ug mabag-o sila. Mapasalamaton ako kay nakaapil kamo sa proyekto para ebanghelisasyon.

Ang Parish Catechist Coordinator Jeanet Arañes nagpasalamat sa mga nangapil sa maong seminar tungod kay nadungagan ang iyang nakat-onan. “Tungod niini, mas mapakaylap pa nako ang mga pamaagi sa pagbasa sa among Bibliya ngadto sa katilingban diin ako nangalagad.”

Si Rodolfo Cajera Sr., PSL sa GKK Santa Cecilia miingon, “alang sa akoa refresher kini tungod aron makahibalo kami sa kasaysayan sa kalibotan. Gikan sa estorya nila Adan ug Eba hangtod karon, ug usab makabalo kami kon giunsa pag compile ang mga libro aron mahimong Bibliya pinaagi sa lamdag sa Espiritu Santo.”

Ang katekista nga si Judelyn Abastas, midungag nga kining seminar nakahatag ug dugang kahibalo bahin koneksyon sa Daan ug Bag-ong Tugon.

Sa kataposan, nanaad ang mga partisipante nga basahon nila kada adlaw ang Bibliya labi na sa panimalay, eskwelahan ug GKK. Malipayon nga nanguli ang tanan bitbit ang Bibliya gikan Daughters of St.Paul. (Imelda Overiz | SRP Malabog)