Pamahayag bahin sa Dekreto sa Batikano labot sa Mary, Mediatrix of all Grace sa Lipa

Dili pa lamang dugay, gipahayag sa mantalaang nasyonal ang mahitungod sa maong Dekreto sa Batikano diin gipahayag nga:

1. Niadto pang Marso 27, 1951 gihukman na, basi sa pagsusi sa mga testimoniya ug ebidensya nga ilang nasusi pag-ayo, nga dili langitnon o supernatural ang mga panghitabo sa kombento sa Carmel sa Lipa niadtong tuig 1948. Sa Marso 28, 1951 ang maong hukom gikompirma mismo sa Santo Papa Pio XII.
2. Busa, ang Dekreto niadtong Septembre 15, 2015 sa Arsobispo sa Lipa, Arsobispo Ramon Arguelles, diin iyang gipahayag ang iyang hukom nga ang mga hitabo niadtong tuig 1948 sa kombento sa Carmel Lipa, gikan sa langit o supernatural ug busa mahimong katoohan, gibawi ug gibali wala, tungod sa mas nahauna na nga paghukom ug sa mas taas nga gahum, kinsa mao ang Santo Papa mismo.
3. Ang negatibong hukom usab sa unom nga mga Obispong Pilipino niadtong Abril 11, 1951, bahin sa mga kahibulangang mga hitabo labot sa pagpakita sa Mahal nga Birheng Maria, ug sa mga pag-ulan og mga “rose petals” mao nay pinal o katapusan nga paghukom, tungod kay ang gahum niini nagasukad naman sa gahum sa Santo Papa.

Sa wala pa nigula ang balita sa mantalaan, nadawat na nako gikan sa CBCP Office ang kopya sa maong dekreto. Naghunahuna na dayon ako nga mahimong madismaya ug malibog pagsamot ang daghang mga deboto sa Mediatrix.

Unsa may kahulugan ug sangputanan niini sa daghan nga mga deboto sa Mary Mediatrix of all Grace sukad pa kaniadto, nga nailhan siya ug gimahal? Sumala na sa atong nasayran, bisan pa sa pagpahunong niini kaniadto, nagpadayon ang mga deboto. Niabot sa Mindanao, ilabi na diri sa Digos ug Kidapawan, Davao. Ug hangtud karon nagpadayon ug nagkakusog, dili lang sa Pilipinas apan sa laing nasud usab.

Kitang mga deboto dinhi sa habagatang dapit sa Davao, dinhi sa atong Diyosesis sa Digos diin ang simbahang prinsipal nato, nga Katedral na karon, mao man ang Mary Mediatrix of all Grace, nakaila na ug gimahal, gipiyestahan na nato siya sukad pa niadtong 1951. Mangundang na ba kita tungod sa maong dekreto sa Batikano?

Ania ang akong tubag niining mga pangutana alang sa atong katin-awan.

1. Ang pagpataliwala sa grasya sa atong Inahan Birheng Maria wala magdepende sa katinuod o dili sa iyang pagpakita sa Lipa kaniadto. Ang Ebanghelyo nagpamatuod niini bahin kaniya. Ang mga pagtulun-an sa Simbahan bahin ni Santa Maria nagpamatuod usab nga siya tigpataliwala gayud uban sa iyang Anak, pinaagi sa iyang Anak, ug diha sa iyang Anak, nga si Jesus. Kining kamatuoran maoy nagpaluyo sa lainlaing debosyon kaniya bisan asa.
2. Ang katapusan Dekreto sa Batikano, nga bag-o pa lamang gipahayag, bahin sa Mary Mediatrix sa Lipa, wala gayud nagpahunong sa debosyon ngadto kaniya. Sa ato pa wala silay nakita nga peligro o dautan niini.
3. Wala usab kita gidid-an nga motoo sa katinuod nga langitnon ang mga hitabo kaniadto sa Lipa Carmel sa 1948. Ang klaro lang gayud, nga sa pagkakaron, daghan pa gihapon ang mga laykong magtotoo ug mga relihiyoso, mga Pari ug mga Obispo ang mitoo, nga nakadugang ug nakapalig-on pa gayud sa ilang pagtoo sa Dios ug sa Simbahan ang maong debosyon.
4. Dili usab gipasabot nga kinahanglan touhan nato ang maong mga hitabo sa Lipa. Anaa ra sa matag usa ang paghukom sa pagtoo niini kon makatabang sa iyang paglambo sa pagtoo.
5. Ang gitinguha sa “Movement for the Dogmatization of the Universal Mediation of Mary” lahi kay sa mga hitabo sa Lipa Carmel. Wala pa ang maong mga hitabo sa Lipa, naa na ang maong paglihok niini nga nagsugod na niadtong unang mga tuig sa 1900, didto pa sa Belgium nga pinanguluhan ni Cardinal Joseph Mercier. Karon, gilunsad na usab sa Pilipinas niadtong pinanguluhan sa pipila ka Obispo sa Pilipinas niadtong Agosto 22, 2015, atol sa pagsaulog sa ika-65 nga kapistahan sa Mary Mediatrix of all Grace sa Diyosesis sa Digos. Ginaorganisa karon ang mga “Marian Crusaders” kinsa nagtahan sa ilang kaugalingon nga mag-ampo alang sa katuyuan niining lihok alang sa dogmarization ug magpakaylap sa debosyon sa Mary Mediatrix of all Grace.
6. Usa ka confradia gitukod ug gipasiugdahan ni Fr. Melvin Castro dinhi sa Pilipinas pipila pa ka tuig ang milabay. Ang katuyuan niining Confraternity of Mary Mediatrix of al Grace mao ang pagpaila ug pagmahal sa Mahal nga Birhen Maria isip Mediatrix of all Grace ug pag-awhag sa tanan nga himoon ang total nga pagtugyan sa Putling Kasingkasing ni Maria sumala sa pagtulun-an ni San Luis Maria Grignon de Monfort. Nakig-alayon usab sila sa mga “Marian Crusaders” alang sa kalamposan sa mga katuyuan sa dogmatization movement.

Si Arsobispo Mariano Gaviola, kanhing arsobispo sa Lipa, sa Hulyo 16, 1992, Pyesta sa Del Carmen, mibugto sa gapos sa mga tawo sa dayag nga pagdebosyon sa Mary Mediatrix of all Grace. Gipagula na usab niya ang orihinal nga imagen sa Mediatrix ug gitugot ang debosyon. Dihang nasaksihan niya ang kainit gihapon sa debosyon sa Mahal nga Inahan, Tigpataliwala sa tanang Grasya, mipahayag kuno siya “kon iya kini sa Dios, walay tawo nga makapugong niini.” Niadtong Pebrero 1993 iyang gimantala ang iyang pagtuo nga ang mga nahitabo sa Lipa kaniadto angay katoohan.

Busa, kon padayon kamo nga matahurong motoo bisan wala makakita, nan, padayon kamo sa inyong pag-ila, pagmahal, ug pagpasidungog kaniya sa iyang pagka inahan, si Maria, Tigpataliwal sa tanang Grasya.

Gidasig ko ang atong mga Kaparian nga pinasikad sa pagtulun-an sa Konsilyo Batikano II ug sa PCP II, giyahi ninyo ang atong mga magtotoo ngadto sa nabag-o ug tiunay nga pagdebosyon sa atong Mahal nga Birheng Maria, pinaagi sa inyong pulong ug pagsaksi sa Marianhong kinabuhi.

Sama sa inyong nahibaloan na, sukad pa kaniadto sa pagkahibalo nako sa kasaysayan sa Mediatrix sa Lipa, mitoo na ako sa maong gasa sa pagbisita sa atong Inahan. Mao usab kini ang gitoohan ni Obispo Clovis Thibault, PME kinsa mihukom, kaniadto pa sa 1951, nga ang simbahan sa Digos ipailawom sa pangama ni Mary Mediatrix of all Grace.

Kauban ako kaninyo sa kanunay ug nagawhag kaninyo sa padayon nga pagpakaylap niining debosyon alang sa kadayganan sa Dios ug kaayuhan sa atong Simbahan dinhi niining “luhaan nga kalibutan.”

Viva Maria. Viva Jesus!

+Guillermo D. Afable, D.D.
Obispo sa Digos
Feast of San Antonio de Padua
June 11, 2016