Former Rebels (FRs) nagtuman sa ilang hustong panlantaw sa kinabuhi

Gikompirmar gayud ang dakong kausaban sa panlantaw sa mga kanhi rebelde kon Former Rebels (FRs) sulod sa ‘Happy Home’ sa ilang bag-o ug hustong direksyon sa kinabuhi. Gipahayag kini sa mga kadagkuan sa maong pasilidad atol sa pakighinabi nga nahimo sa mga sakop sa Comprehensive Local Integration Program (CLIP) sa pipila ka inmates, sa miaging bulan. Gipahayag sa mga nahisgutan nga dili ti-aw ang mga kasinatian sa mga FRs diha sa ilang mga paningkamot sa pag-usab sa kaugalingon, pinaagi usab sa mga giya ug counseling nga ginahatag og inanay sa lugar.  Upat ka mga FR matud pa ang mipadayag sa ilang kalipay ug pasalamat sa dakong personal nga tabang nga nahimo kanila sa pasilidad, hilabi na sa paghatag og dakong higayon aron makasugod sila og bag-ong panid sa ilang kinabuhi, ug kini alang usab sa kaayohan sa ilahang mga pamilya.

Ang CLIP benchmarking activity gipahigayon sa Dormitel, Government Center, Dahican, sa siyudad sa Mati. Nanguna sa paghimamat sa mga bisita gikan sa kinatibuk-ang Mindanao sila si DILG Prov’l Director Yvette Tolentino-Sunga ug outgoing Governor Corazon Malanyaon. Kahinumduman nga ang ‘Happy Home’ ang nahimo usa sa mga best practices sa probinsiya sa Davao Oriental nga segun pa, ginasundog sab sa ubang LGU’s sa nasud.

******

Ang Kalibutanong Adlaw sa Komunikasyon 2016 ang gisaulog hangtud sa bulan sa Hunyo sa managlahing mga parokya sa diyosesis sa Mati. Tungod sa pagka-delatar sa mensahe gikan sa CBCP-Episcopal Commission on Social Communications alang pa unta sa bulan sa Mayo gipahigayon sa kaparian ang selebrasyon sa World Communications Day 2016 sa simbahang katolica sa ilang mapili nga Domingo gikan sa ikatulo nga semana sa Mayo hangtud sa bulan sa Hunyo. Gisangon sa kura paroko ang tahas sa pagpasabot sa mga parokyano ang mensahe sa Sto. Papa kabahin sa tema sa  ‘Komunikasyon ug Kalooy: usa ka Mabungahong Panagtagbo’ (Communication and Mercy: A Fruitful Encounter). Sa samang bahin gipahinumduman usab ang hingtungdan, labi na ang Diocesan Ministry of Social Communications sa pagpadala sa ilahang kontribusyon ngadto sa CBCP Episcopal Commission on Social Communications (CBCP-ECSC), samtang igahin ang gisabutan nga bahin usab alang sa lokal nga ministriya sa Social Communications and Mass Media sa simbahan.