Bibliyampo sa GKK gihandum

Ang kinaunhang “Bibliyampo Congress” nga gipahigayon sa arkidayosis sa Dabaw didto sa St. Joseph the Worker Parish, Sasa, niadtong Sabado, Hunyo 18 giatngan nga mukanaog sa mga GKKs.

Nakit-ang makatabang ang “Bibliyampo” pagpagpalawom sa pulong sa Diyos diha sa mga GKKs.

Si Sis. Helen nga taga Sto.Rosario nanghinaut nga mahimo usab nila kini sa ilang parokya sa Toril. Nadungagan ang kahibalo ni Brod. Rogelio Obarte gikan sa Immaculate Concepcion Parish, Samal. Matud pa ni Sis. Rita Mariano ug Brod. Armando Licao nga pagpahibalo kini sa kamahinungdanon sa bibliya mao nang angay ipahigayon sa GKK.

Giabi-abi ni Fr. Ritsche Gamaya ang tanang partisipante isip pag abli sa maong programa. Iyang gipasabot ang kabililhon sa pag-ampo ug gibatbat ang kasinatian sa usa ka pamilyang nagkahiusa sa pag-ampo pinaaagi sa pagsabot unsang oras sila dungan mag-ampo bisan sila nagkalagyo tungod sa trabaho.

Human sa “Bible enthronement”, gituki sa St. Francis Xavier Regional Major Seminary (REMASE) Professor nga si Fr. Rene Ribac ang kabililhon sa kinabuhi sa pamilya, inubanan sa gugma ug pagpaminaw sa pulong sa Dios.

Testimonya sab ang midugang sa kadasig sa mga partisipante sa wala pa nagsugod ang misa nga gipangulohan ni Fr. Dionisio Tabiliran, kura paroko sa St. Joseph ug Vicar Forane sa St. James.

Nagpasundayag ang mga presentasyon subay sa temang “Strengthening the Family through the Word of God and the Eucharist” pagkahuman sa paniudto.

Daug sa unang ganti ang St. James vicariate, ikaduha San Pedro vicariate, ug ikatulo St. Anne vicariate sa gipahigayong “photo gallery” kon “exhibit.”

Matud pa sa Archdiocesan Bible Apostolate of Davao (ABAD) Coordinator Mila Punzalan ug Bibliodrama Coordinator Mads Tito, tumong sa Bibliyampo ang pagdasig na usab sa matag apostolado sa bibliya sa matag parokya. (Carmen D.Timario | SJP SoCCom)