Viva Señor San Jose

Gahapon sa hapon among gikonsagrar ug gitugyan ang bag-ong simbahan ni San Jose didto sa Sta. Cruz, Davao del Sur pinaagi sa nindot kaayo nga rito sa Simbahan sa pagkonsagrar. Atol kini sa ilang ika-74 nga piyesta sa parokya padulong na sa ika-75 diamond jubilee 2017. Viva Senor San Jose! Pahalipay sa tanang taga Sta Cruz! ang pinakaunang parokya nga gitukod sa habagatang Davao

Nagsugod ang rito pinaagi sa pagtugyan sa nahuman nga bag-ong simbahan sa mga tawo nga nagkahiusa sa pagpahigayon sa pagtukod sa simbahan ngadto sa Obispo nga nagrepresentar sa simbahang lokal sa Digos. Ang mga plano sa simbahan, mga ngalan sa nahilambigit sa mga komitiba, ang kopya sa financial report ubp. maoy gitugyan nila sa Obispo.

Gibindisyonan og balaang tubig ang tanan sa Simbahan nagpahinumdum sa bunyag sa tanang magtotoo nga giluwas ug gisangunan og misyon sa pagsaksi sa Ebanghelyo nga malipayon ug balaan, pinaagi kang Kristo, uban kang Kristo ug diha ni Kristo.

Misunod ang pagsaulog sa Pulong sa Dios. Natapos kini sa pagawit sa Litaniya sa mga santos.

Giinsensohan ang tibuok simbahan ug ang mga tawo nga nanambong pagpahumot sa tanan aron mahimong angayan nga spiritohanong sakripisyo ngadto sa Dios.

Ang pinaka sentro sa pagkonsagrar sa simbahan mao ang pagdihog sa altar sa Eukaristiya ug sa mga haligi sa simbahan, 12 ka buok, nga simbolo sa apostolikanhong gigikanan sa Simbahan.

Ang kasaulogan nahisama sa rito sa bunyag. Ang mga timaan nga gigamit mao ra gihapon, tubig, krisma, dinagkotang, kandila, puting tela, pagpamati sa Pulong sa Dios.

Ug sama sa bunyag, gitapos ang kasaulogan pinaagi pinaagi sa pagsaulog sa Eukaristiya nga maoy gigikanan ug padulngan sa tanang sakramento sa Simbahan ug sa tanan niyan kalihokan.