Testimoniya mahitungod kang Msgr. Ed Rodriguez

Ang among masulti gikan sa among kasing-kasing dala sa among kasinatian uban ni Msgr. Ed Rodriguez sulod sa napulo katuig mao kini: siya maloloy-on ug manggihatagon ilabina sa mga kabus, manggihuna-hunaon, yano ug mapaubsanon, dali maduolan, dili gayud siya mobalibad ilabina kung kini alang sa kaayohan.

Nabati gayud namo ang iyang pagka-amahan. Apan luyo niining tanan aduna usab siya’y “pagkaperfectionist.” Sama ni Kristo nga nasuko, siya usab usahay mo-ulbo ang kasuko. Ilabina sa higayon nga adunay mga butang nga dili mahaum sa iyang gipahimu. Usahay mahibulong nalang mi nga nibuto na ang pultahan, muduko nalang mi sa hilum.

Apan kung maulian na siya mapaubsanon siya nga modawat sa iyang mga kakulangan. Maghimo siya’g mga butang nga makabawi sa iyang gikasuk-an sama sa pagdala ug ice cream ug uban pa. Kung aduna siya’y mga lakaw, o seminar, dili gayud siya mahikalimot pagdala ug pasalubong bisan unsa kabug-at sa iyang mga bagahe dili niya igsapayan.

Daghang mga hiyas si Msgr. Ed nga sa hilum, sa tago, kini makapatandug ug makahatag ug maayong panig-ingnan kanamo ug sa uban. Ang matag usa kanato adunay tagsa-tagsa ka mga gasa, masalaypon, ug lahi sa uban apan kon kita mapaubsanong modawat niini kini makapahiusa subay kabubut-on ug plano sa Dios sa atong kinabuhi.

Sa katapusan, dili namo makalimtan ang mga pulong nga gibalik-balik pagsulti ni Msgr. Ed nga nag-ingon, “DAUGA ANG DAUTAN PINAAGI SA MAAYO.” Si Msgr. Ed tawhanon kaayo apan puno sa pagka-espirituhanon.

Happy Golden Anniversary Msgr. Ed!
(Jojo and Jingjing, Sto. Niño Shrine staff)