Palawman ta ang pakighimamat sa Dios

Solemnidad sa Santisima Trinidad
Panultihon 8:22-31/ Ps. 8/ Rom. 5:1-5/ Jn. 16:12-15

Nailhan mo na ba gayod ang Ginoo? Nailhan mo na ba ang imong kaugalingon? Kinsa kaha kanato ang nakaila na sa tinuoray ug kinatibuk-an sa Dios ug sa iyang kaugalingon?

Napadayag na sa Ginoo ang tanan nga buot niyang ipadayag kanato. Wala na siya’y angay pang ipaila kanato. Nasulti na niya ang tanan nga angay niyang isulti kanato pinaagi sa iyang Bugtong Anak. Wala na kita nagpaabot pa ug lain pang pagpadayag. Apan daghan pa gihapon kita’g angay masabtan ug maklaro kinsa gayod ang Ginoo. Daghan pa kita’g angay masayran mahitungod sa atong kaugalingon ug sa atong relasyon sa Dios.

Sa pag-ingon ni Hesukristo sa Ebanghelyo karon nga daghan pa unta siya’g isulti kanato apan dili nato madawat karon, buot niyang ipasabot nga daghan pang mga butang nga angay natong masabtan sa iyang gipasabot kanato. Tungod sa atong tawhanong limitasyon ug kahuyang dili nato makab-ot dayon ang tanan nga iyang gipadayag. Apan gikan sa iyang gisulti magkaanam ug kalalom ang atong pagsabot mahitungod kaniya. Gikan sa iyang mga gipadayag ug pagpaila pinaagi sa iyang mga pulong ug buhat molalum ang atong pagpakigrelasyon kaniya.

Bisan sa ikaduhang pagbasa, ang pagsulay makahatag kanato sa pasensiya ug pagpailob. Sa mga kalisod ug hagit atong maangkon ang paglaum nga dala sa pag-ila sa kaayo sa Ginoo. Pinaagi sa mga pagsulay maangkon nato ang kaalam nga gihisgutan sa unang pagbasa, kanang kaalam nga sukad pa sa paghimo sa kalibutan anaa na. Si Kristo ang Bugtong Anak mao kanang kaalam nga magpaila kanato sa presensiya sa Ginoo sa atong matag adlaw nga kinabuhi.

Niining Solemnidad sa Santisima Trinidad, usa ka Dios sa tulo ka persona, atong ipaduol ang atong mga salabutan ug kasing-kasing ngadto sa Dios. Palawman ug lig-onon ta ang pagpakighimamat kaniya sa matag-adlaw nato nga mga buhat aron mas mailhan nato siya.