Msgr. Ed naningkamot gihapon mamahimong angayan sa pagkapari

“I am a priest not because I am worthy but solely by the grace of God I am what I am. Like Peter I am overwhelmed with my weaknesses and would say – depart from me Lord for I am a sinful man… but oftentimes I go to confession, I hear the Master says ‘Do not be afraid.’”

Mao kini ang tubag ni Msgr. Edgardo V. Rodriguez o Msgr. Edrod, sa kaugalingon sulod sa 50 ka tuig o panahon nga iyahang mahuna-hunaan o mapangutana ngano siya napili ug mingtubag sa tawag sa pagkapari.

Usa ka Misa nga gisundan sa panihapon ug programa ang gipahigayon isip pagsaulog sa anibersaryo sa pagkapari ni Msgr. Edrod kaniadtong Mayo 1, 2016 sa St. Francis Xavier College Seminary.

Ang misa gipangulohan mismo ni Msgr. Ed uban ang pipila ka mga pari ug mga  obispo sama nila ni Bp. Guillermo Afable sa Digos, Abp. Emeritus Fernando Capalla, ug ang kasamtangang Arsobispo sa Davao na si Abp. Romulo Valles.

Mitungha usab ang mga nagkalain-laing mga personalidad, religious congregations, ug mga kapamilya nga naggikan pa sa laing nasud ug siyudad kinsa suod kang Msgr. Edrod sukad sa iyang pagka-bata ug pagsugod niya isip usa ka pari.

Si Msgr. Edrod ang usa sa mga pinakaunang mga Katolikong diyosesan nga pari nga gi-ordinahan sa Arkidiyoses sa Davao didto mismo sa St. Francis Xavier College Seminary 50 ka tuig na ang milabay.

Nahinumduman niya ang suod nga amigo nga si anhing Fr. Paul Cunanan kinsa maoy kadungan niya sa ordinasyon kaniadto.

Pipila ka mga tawo ang minghatag ug testimonya mahitungod sa mga kasinatian kauban ang Monsignor gikan sa iyang mga igsuon ug layko.

Unang mihatag sa iyang testimonya si Retired Judge Jesus Quitain kinsa ninglantaw pagbalik sa kaagi sa dakbayan sa Dabaw human sa World War II ug giunsa pagtindog sa Katolikong Simbahan sa Dabaw kung asa si Msgr. Ed, agi sa paningkamot sa lahi-lahi nga mga formators, nahimong usa sa mga pinakaunang pari sa Arkidiyoses sa Dabaw.

Minghatag usab ug mensahe pinaagi sa recorded video si Bishop Teodoro Cruz Bacani, Jr., kanhing Auxiliary Bishop sa Manila ug nahimong usa sa mga kaklase ni Msgr. Edrod sa seminary. Si Bp. Bacani miingon nga susama sa usa ka bulawan si Msgr. Ed “…a gold tested by fire.”

Si Msgr. Martiniano Gorgonio, kura paroko sa Sta. Ana Shrine, nihatag usab sa iyang testimonya mahitungod sa Monsignor ug miingon nga kang Msgr. Edrod niya natun-an ang kaalam sa sakto ug maampoong pag-andam sa homilya kadtong seminarista pa siya sa San Carlos Major Seminary sa Cebu. Ang selebrasyon nahimo usab nga lingaw kay nagpasundayag ang mga kaparian pinaagi sa pagkanta nga gipangulohan ni Msgr. Ed Labagala.

Dako ang pasalamat ni Msgr. Edrod sa mga mingtambong sa selebrasyon ilabi na sa iyang mga kapamilya ug mga naagiang mga parokya o ministriya. Si Msgr. Edrod karon nagpadayon isip usa ka maayong pari sa dakbayan ug diha kasamtangang nangalagad sa Sto. Niño Shrine sa Shrine Hills, Matina, Davao City.