Malampusong 1st BEC and Family Day 2016

Niadtong Abril 30 hangtud Mayo 1, ang Parokya ni San Pedro Claver sa Tarragona, Davao Oriental, nagpahitabo og Unang Basic Ecclesial Community (BEC) ug Family Day atol sa tinuig nga pagsaulog sa Parish Day uban sa tema: Pamilya Haligi sa Katilingban.” Kining maong selebrasyon gipahitabo sulod mismo sa bag-ong simbahan nga padayon pang ginatrabaho ug gitambongan sa tanang mga katilingban sa nagkadaiyang Zona. Ang mga partisepante nikabat og kapin usa ka libo.

Malipayong gisugdan ang maong selebrasyon sa parada ug gisundan dayon sa Santos nga Misa pinanguluhan ni Kura Paroko Reverend Fr. Medardo A. Salomia. Panahon sa homiliya, gipalauman ni Fr. Salomia kung unsa ang tumong ug tinguha sa maong buluhaton. Matud pa niya, “Ang kalig-on sa Ecclessial Community nakabase pud sa kalig-on, kasibot ug kahamatong sa Pamilya. Kini maoy hinungdan ngano nga sa unang higayon gisaulog ang BEC ug Family Day sa parokya aron paghatag kabililhon ug importansiya niini subay sa deklarasyon sa Simbahang Katoliko ubos sa kaobispohan ang tuig sa Pamilya, Eukaristiya ug Gagmay’ng Simbahanong Katawhan. Daku ang iyang panghinaut nga kini unta mahitabong pagahimoon matag tuig sa tibuok Simbahan particularmente sa Diocese of Mati aron pagpakita sa pagkamahinungdon niini sa Diyoses.”

Ang kinatibuk-ang kalihukan sa maong selebrasyon gilangkuban dili lamang sa liturhiya kundili programa nga gisalmotan sa napulo ka Zona, Forum kabahin sa tema nga gipaambit ni Mr. Edgar Diares (Mindanao Lay Forum Director), pag-inambitay sa kasinatian sa Gagmay’ng Simbahanong Katilingban ug gitapos sa nagkadaiyang mga dula ug parlor games.

Sa katapusan, si Fr. Salomia kinasingkasing nagpasalamat sa tanang katawhan nga nakatabang ug nakatampo materyal man o pinansyal sa kalampusan sa maong selebrasyon ilabi na sa Parish Pastoral Coordinating Council (PPCC) pinanguluhan ni Madam Myerna Sagpang, mga nagkadaiyang apostolado, mga batan-on, komitiba sa edukasyon ug mga personalidad. (Randy Simon Osiba)