Flores de Mayo – Gisugdan na sa Archdiocese sa Davao

Usa ka makahuluganon nga tradisyon sa Simbahang Katoliko sa Pilipinas mao ang paghimo sa tinuig nga “Flores de Mayo” matag bulan sa Mayo. Ang “Flores de Mayo’ usa ka Kinastila nga pinulungan nga sa ato pa “Mga Bulak sa Mayo.”

Ang kinauyukan niining maong kasaulugan mao ang paghatag ug pagdayeg sa Mahal nga Birhen Maria agi’g pagpasidungog kaniya tungod sa iyang dakong papel diha sa hitabo sa atong kaluwasan. Ang maong pagpasidungog ginapadayag sa mga kabataan pinaagi diha sa ilang paghalad ug mga bulak ug mga pag-ampo ngadto sa Mahal nga Birhen.

Sagad sa mga parokya nga sakop sa Archdiocese sa Davao, naghimo na sa ginatawag nga “launching activity” o ang opisyal nga pag-abli sa mga kalihukan sa Flores de Mayo. Niadtong Mayo 1 gihimo gayud dayun sa parokya sa San Roque Malabog, ingun man sa parokya sa San Isidro Lumondao, ug uban pang mga parokya, ang pag-abli sa Flores de Mayo, samtang ang San Pedro Cathedral naghimo sa pag-abli niadtong Mayo 2 sa alas 6 sa buntag.

Sumala ni Sr. Mary Julianne Villarin, OSB, head-catechist sa San Pedro Cathedral, “importante gayud sa mga kabataan karon nga moaapil sa Flores de Mayo aron aduna silay makutlo nga mga pagtulun-an sa Simbahan, ilabina sa henerasyon karon nga halos wala na kaayo naghatag ug pagtagad sa mga butang espirituhanon.” Gihagit usab ni Sr. Mary Julianne ang mga katekista kinsa maoy manudlo sa mga kabataan, nga sila usab mamahimong ehemplo ug nga makita unta diha kanila ang mga hiyas sa Mahal nga Birhen Maria.

Ingun usab niini ang panghinaut ni Mrs. Jeanifer Arañez, usa ka katekista sa Parokya sa San Roque Malabog. Matud niya, “kinahanglan gayud nga ang mga katekista magmalahutayon- ug tun-an nila pag-ayo ang matag leksyon nga ilang itudlo ngadto sa mga kabataan aron mas magmabungahon ang ilang pagpanudlo…” Panawagan usab niya nga suportahan sa mga ginikanan ang ilang mga anak aron madasig sila sa pag-apil sa maong kalihukan.

Sa parokya sa San Jose,Sasa, gipangusgan ang pagpangandam sa Flores de Mayo pinaagi sa paghimo ug usa ka adlaw nga Seminar Workshop niadtong Abril 24, alang sa mga katekista nga moadto sa mga GKK aron manudlo. Sumala ni Mrs. Madelyn Tito, head-cathechist ug GKK in-charge sa maong parokya, aduna silay pagahimoon nga Culmination karong umaabot nga Mayo 31, ug usa sa mga kalihukan niini mao ang Children’s Bible Camp.

“Ang Flores de Mayo usa gayud ka nindot nga tradisyon. Importante kini aron mapalambo ang pagtoo sa kabataan, ilabina ang espeyal nga debosyon ngadto sa Mahal nga Birhen Maria.” Mao kini ang panglantaw ni Ms. Flory-anne Sera, usa ka propisyonal nga katekista gikan sa parokya sa Isidro, Lumondao. (Cristopher Alcayde)