DXGN 89.9 Spirit FM Pormal nang ilunsad karong Hunyo 2016

Ang DXGN 89.9 Spirit FM ningbalik na sa kahanginan human ang kapin pito katuig na kini mahilom. Nagsugod ang test broadcast sa maong estasyon kaniadtong Disyembre 9, 2015. Pinaagi sa mga tabang sa nagkadaiyang parokya, pastoral offices, tulunghaan, organisasyon ug mga laykong magtutuo, nahimong possible na mabalik sa kahanginan ang radio station sa Arkidayoses sa Dabaw.

Karong umaabot nga Hunyo 13, 2016, pormal nang ilundsad diha sa kahanginan ug mga lumulupyo sa mga diyosesis sa Davao, Digos, Tagum, ug Mati kon DADITAMA region. Ang maong paglunsad sa estasyon gitunong mismo human sa binulan na panagtapok sa mga kaparian sa Arkidayoses sa Dabaw o sa Presbyterium aron kini masuportahan sad sa mga pari gikan sa lain-laing nga mga parokya. Kini pakabuhaton sa San Pablo Parish sa Juna Subdivision, Matina, Davao City. Human sa pagpulong-pulong sa mga kaparian adunay Santos nga Misa na pakabuhaton na panguluhan sa arsobispo sa Dabaw nga si Arsobispo Romulo Valles, D.D. kinsa usa sa mga nagduso uban ang mga lain pang Obispo sa pagbalik sa DXGN. Human sa misa, adunay mubo na programa ang pakahimuon kung diin ilunsad sad ang mga lahi-lahing programa sa Spirit FM ug ang paghatag ug mensahe ni Arsobispo Muloy.

Ang matag tabang sa lain-laing mga indibidwal, bisan kadtong mga ginagmay, nahimong nakatabang ug dagko sa pagbalik sa maong estasyon susama sa kampanya nga “25 Sentimo para sa Radyo Ko” na nakakuha ug dagkong suporta gikan sa mga tulunghaan sa dakbayan susama sa University of the Immaculate Conception ug sa mga parokya sa Virgen delos Remedios sa Toril, Virgen Dolorosa sa Babak, Samal, San Antonio de Padua sa Agdao, ug sa St. James sa Lasang.

Ang Archdiocesan Commission on Social Communication na gipangunahan ni Rev. Fr. Ritsche Gamaya, DCD, malipayong ginaawhag ang tanang mga SoComm (Social Communications) sa matag parokya, mga pari, tulunghaan, organisasayon, ug indibidwal na mutungha sa paglunsad sa DXGN. (Jecy Opada)