Corpus Christi

May 29, 2016, Corpus Christi
Gen. 14:18-20/ Ps 110:1-4 / 1 Cor 11:23-26 / Lk. 9:11-17

Karong Domingoha, atong gisaulog ang Solemnidad sa Balaang Lawas ug Dugo ni Kristo kun Corpus Christi. Kini usa ka dakong kapistahan sa liturhiya sa atong Simbahang Katoliko nga nagsugod pa niadtong tuig 1200.

Ang atong mga pagbasa atol niining atong pagsaulog sa Solemnidad sa Balaang Lawas ug Dugo ni Kristo, nag-awhag kanato sa pagpamalandong sa tinuod nga kahulugan sa Balaang Sakramento sa Eukaristiya.

Ang unang punto atong makutlo diha sa atong unang pagbasa diin atong hisayran nga ang Hari sa Salem nga si Melquisedec, mihatag ug pan ug bino ngadto kang Abram kinsa gigutom ug gikapoy sa pagpakigsangka sa mga hari nga midagit sa iyang pag-umangkon nga si Lot. Ang gibuhat nga pagpaambit ni Melquisedec sa pan ug bino ngadto kang Abram, adunay dakong kalambigitan sa atong gisaulog nga Sakramento sa Eukaristiya. Makita nato diha kang Melquisedec ang kina-iya sa pagkamanggihatagon, kinaiya nga angay natong batunan matag higayon nga kita moapil sa kasaulogan sa Santos nga Eukaristiya.

Kining unang punto sa pamalandong modala kanato sa ikaduhang punto nga maoy mensahe sa atong ikaduhang pagbasa karong adlawa, diin diha sa unang sulat ni San Pablo ngadto mga taga Corinto, iyang gisaysay pag-usab ang nahitabo sa dihang gitukod ni Hesus ang Santos nga Eukaristiya. Sumala pa sa mga batid sa theolohiya, gituyo ni Pablo pagsaysay pag-usab ang pagkatukod ni Hesus sa Sakramento sa Eukaristiya, aron masabtan sa mga taga Corinto ang tinuod gayud nga kahulugan niini. Tungod kay sumala pa, nahitabo nga adunay panagbingkil-bingkil ug dili pagsinabtanay sa mga sumusunod ni Kristo didto sa Corinto. Nabatasan man gud sa mga unang Kristiyano nga sa dili pa saulogon ang Santos nga Eukaristiya, mangaon una sila. Apan inay nga mag-inambitay sila sa mga pagkaon nga ilang gidala gikan sa ilang tagsa-tagsa ka panimalay, ang nahitabo nabahin-bahin na hinoon sila. Ang mga adunahan mag-usa sa pagpangaon hangtud mabusog sila, samtang ang mga kabus anaa lamang sa kilid nagtan-aw kanila. Gigamit kini nga higayon ni San Pablo aron pahinumduman sila kung nganong gitukod man ni Hesus ang Eukaristiya, pahinumdum nga alang usab kanatong tanan karon.

Kay nganu ba nga gitukod man ni Hesus ang Eukarisiya? Tungod ba kay gusto lang niya magpabilin uban kanato isip pan ug bino? O tungod ba gusto lang niya nga ibutang nato siya sa tabernakulo aron ampoan ug simbahon? Ang tubag “Dili!” Gipili ni Hesus nga magpabilin kanato isip pagkaon, tungod kay sayud siya unsa ka halangdon ang pagkaon sa tawo aron siya mabuhi. Gani diha sa atong Ebanghelyo, gipamatud-an kini ni Hesus pinaagi sa Iyang pagpakaon sa lima ka libo. Sa ato pa, ang pagkaon importante gayud aron mabuhi ang tawo, ug sayud si Hesus niini.

Apan ang pahinundum mao kini: ang Sakramento sa Eukaristiya dili mao ang matang sa pagkaon nga kaonon lamang mag-inusara, o pagkaon nga angay ikadalo. Ang Eukarisitiya mao ang matang sa pagkaon nga kinahanglan ipaambit ngadto sa uban, ilabina sa mga nagkinaghanglan. Tungod kay ang Eukaristiya sakramento sa panag-hiusa ug pagpakigdit. Busa dili tukma ug dili haum nga ang mga nagsaulog niining maong sakramento nagkawatak-watak ug nagkabahin-bahin tungod lamang sa panagbingkil-bingkil ug dili pagsinabtanay. Tungod kay ang tanan nga mokaon sa lawas ug moinum sa dugo ni Kristo, mahiusa man usab diha Kaniya.

Ato karong pamalandungan ang atong pagkinabuhi diha sa atong Kristohanong Katilingban. Usahay ang atong kasinatian usab dili ra layo sa kasinatian sa katilingban sa Corinto diin anaa ang dili pagsinabtanay, ang panagbingkil, ang pagsinahay, ug uban pang mga kasinatian nga dili makahatag ug kaayo sa katilingban. Sama pananglit sa naghitabo sa dihang nagdulong pa ang piniliay. Tataw kaayo nga tungod sa managlahi nga mga baruganan ug mga kandidato nga gidapigan, adunay mga nagsakit nga kabobot-on, ug gani aduna pay nangaguba nga relasyon.

Ang kasaulogan sa Solemnidad sa Corpus Christi naga-awhag sa tanan nga panahon na sa pagpakig-uli aron ang mga samad sa milabay nga mga kasinatian maalim na. Diha kang Kristo usa lamang kita ka lawas: usa ka Simbahan nga adunay usa ka pagtoo, ug nag-inambitay sa usa lamang ka pan sa kinabuhi, nga mao ang lawas ug dugo ni Kristo.

Hinaot nga ang atong makanunayong pagkalawat sa lawas ug dugo ni Kristo, magdala kanato sa kaluwasan ug dili sa kaalaotan!