50th World Com Gisaulog sa St. Mary Parish

Gisugdan ang mabulokon ug dakong kalihukan sa pagsaulog sa Ika-50 ka tuig sa pangkalibutanong Domingo sa Komunikasyon niadtong Mayo 8, 2016 pinaagi sa Santos nga Misa nga gipangulohan sa Kura Paroko sa St. Mary of the Perpetual Rosary nga si Fr. Jess Samaniego. Dinhi ning maong okasyon gipaila sa Kura Paroko ang 67 nga lumilihok sa GKK SoCCom. Sila iyang gipahinumduman sa ilang dakong gimbuhaton nga mao ang pagpadala sa Maayong Balita ngadto sa tanang katawhan diha sa GKK.

Sa samang pagkaagi kining inyong tigsulat, uban ni Sis. Hermie Mapute nga mao ang Parish SoCCom Coordinator sa Parokya, mipaambit sa hamubong Orientation kabahin sa News Writing. Sunod niini, gihimo dayon ang pagpahimo og balita sa mga GKK SoCCom, diin ang tumong niini nga makahimo sila’g artikulo ug mabansay ang ilang kahibalo sa pagcompose og balita. Dugang usab nga gipaambit sa mga partisipante mao ang ilang mga buluhaton ug katungdanan isip miembro sa Komitiba sa Social Communications.

Malipayon ang tanan sa ilang naangkon nga kaalam ug nagpasalamat sa Dios sa gasa sa kadasig nga tungod niini mihalad sila sa kaugalingon aron sa pagpangalagad. (Naldz Villodres, SMPRP SoCCom)