PSKB ug PSK sa Parokya sa St. Mary Gipadala sa Pagsaksi

Niadtong Abril 3, 2016, mibag-o sa ilang panaad ang mga Pangulo Sa Kristohanong Banay nga mag-alagad sa 55 ka mga GKKs sa St. Mary of the Perpetual Rosary Parish nga gipangulohan sa magtiayon nga Maurillo / Delia Frias. Kining mga PSKB mao ang mga magtiayon nga maglantaw sa kinabuhing espiritohanon sa pamilya diha sa GKK, moprotekta sa sagradong kinabuhi sa tawo, mopalambo sa natural nga paagi sa pagplano sa pamilya, moalkontra sa sayop nga propaganda sa “safe sex” sa pagpugong sa HIV/AIDS ug uban pang Kristohanong bili nga nagtudlo sa pagrespeto sa balaod sa Dios diha sa kaminyoon ug sa pamilya. Sila usab ang mopahigayon sa nagapadayon nga Family and Life Formation. Samtang ang mga Pangulo sa Katilingban sa mga GKK nga sakop ning maong parokya nga gipangulohan na karon ni Bro. Dionisio Daro, Jr. nanumpa usab nga mosaksi kang Kristo diha sa pulong ug sa buhat, ug nga sila nga mga Pangulo Sa Katilingban mahimong mga sumbanan sa mapaubsanong pagpangalagad, nga si Kristo ang mapaubsanong Ginoo makita diha sa ilang kaugalingong kinabuhi… kinabuhi nga nagsalamin sa kinabuhi sa Manunubos nga nagalantaw sa kaayohan sa tanan ug dili kay sa pipila lamang. (Naldz Villodres)