Pagpili og Presidente ug Bise Presidente

Daghan na nga higayon gipangutana ako kon kinsa akong isugyot nga botohan sa pagkapresidente. Sa kanunay naglikay ko sa paghingalan kon kinsa, bisan og duna nako’y hukom. Hinonoa, ako mihatag hinoon og mga giya sa pagpili. Ania ang akong mga isugyot sa paghukom kon kinsa ang inyong botohan.

Una. Matag unom ka tuig, gitagaan kitag higayon sa pagboto sa presidente ug bisepresidente. Angayan gayud nga tarongon nato ang paghukom kon kinsay tugyanan nato niining pagkapresidente nga dako og ikaayo o dugang ikadaot, depende sa mapilian. Sa ato pa, ang pagpataka og boto, ang pagbaligya sa boto, o pagpugos sa uban sa pagboto, dili pagtahod sa kasagrado sa tawo ug sa boto sa tawo nga gipiyal kaniya alang sa kaayuhan sa tanan.

Ika-2. Botohan lamang ang maaayo. (I Vote Good). Matud pa sa mga kaobispohan sa Pilipinas, “Pilion nato kadtong tinuod nga ligdong, naghalad sa kaugalingon, nagtahod sa kahalangdon sa tanan ug mabination sa mga kabos”

Maapil diri ang pagboto kanila bisan pa minos maayo, tungod kay walay kandidato nga perpektong maayo. Ang tanan duna gayud mga apan ug kakulangan.

Ika-3. Dili moboto sa dautan ug bisan minos nga daotan. Ang mga Obispo midugang pagingon, “Isalikway nato kadtong dili matinuuron, mga tikasan, mga nangita lamang sa kaugalingong interes ug hingalimtanon sa mga kabos. “Ang dili pagbotar sa partikular nga puwesto kon walay usa nga sibo niini, usa usab nga tinugotan nga Kristuhanon nga politikanhon nga pagpili. Pagbotar og minos nga daotan, pagbotar gihapon og daotan.” Dili masayang ang boto kon walay mabotohan nga maayo.

Ika-4. Kon adunay maayo nga kandidato pagkapresidente nga mabotohan, iapil usab ang iyang gisaligan sa pagkabise presidente – ang iyang kaubang kandidato. Sa ingon niini, dili mausik ang panahon, kamaauhan ug katigayunan nga igastos sa bisepresidente nga kontrabida sa presidente. Daghan na kitang kasinatian niining pagkausik sa higayon kay kontrabida ang nabotohan nga bisepresidente. Mas maayo kaayo kung magkatinabangay sila sa hiniusang kaayuhan sa tanan, lakip na ang wala moboto kanila.

Ika-5. Alang sa maayo ug mabungahong panggamhanan, gikinahanglan nga malungtaron ang atong panglantaw. Ang usa ka termino nga 6 ka tuig dili igo sa bisan kinsang maayo nga presidente sa pagpahigayon sa mga kabag-ohan sa mga hunahuna ug pamaagi sa panggamhanan. Sa ato pa, ang kultura sa panggamhanan. Komplikado kini kaayo. Ang pagusab-usab sa mga mangulo, stilo sa pagpangulo, nakababag gayud sa mapadayonong paglambo. Nagsige na lang kita og sugod sa uno ug sulbad og mga kapalpakan sa nangagi.

Naa kahay tandem nga inyong mapilian kon sundon ninyo kining mga sugyot?